Football: राष्ट्रीय ज्युनियर फुटबॉल स्पर्धेत गोव्याच्या मुली अंतिम फेरीत

National Junior Football Tournament: जबरदस्त फॉर्ममध्ये असलेल्या पर्ल फर्नांडिस हिच्या प्रेक्षणीय हॅटट्रिकच्या बळावर गोव्याने राष्ट्रीय ज्युनियर (१७ वर्षांखालील) महिला फुटबॉल स्पर्धेची अंतिम फेरी गाठली. राजस्थानमधील जोधपूर येथे शुक्रवारी झालेल्या लढतीत आसामवर ३-० असा सफाईदार विजय नोंदविला.

सामन्यातील सुमारे ७० मिनिटे दहा खेळाडूंसह खेळूनही गोव्याच्या मुलींनी एकतर्फी विजयास गवसणी घातली.

साखळी फेरीतील तिन्ही सामने जिंकलेल्या जोनाथन फालेरो यांच्या मार्गदर्शनाखालील संघाचा हा सलग चौथा विजय ठरला. पर्ल हिने साखळी फेरीत आठ गोल नोंदविले होते. आता चार लढतीनंतर तिची एकूण वैयक्तिक गोलसंख्या ११ झाली आहे.

शुक्रवारी पर्ल हिने पहिला गोल १७व्या मिनिटास केला, नंतर अखेरच्या तीन मिनिटांतील खेळात आणखी दोन गोल नोंदविले. ८७व्या मिनिटास संघाची आघाडी वाढविल्यानंतर तिने ९०+४व्या मिनिटास हॅटट्रिक साधली.

पर्ल हिने पहिला गोल फातिमा ब्रागांझा हिच्या शानदार पासवर नोंदविला. सामन्याच्या ३३व्या मिनिटास गोव्याच्या प्रिस्सी परेरा हिला थेट रेड कार्ड दाखविण्यात आले, त्यामुळे बाकी कालावधीत दहा खेळाडूंसह खेळावे लागले.