कर्नल सी. के. नायडू करंडकमध्ये गोव्याची दमदार सुरवात

पणजी: वेगवान शुभम तारी याने कर्नल सी. के. नायडू करंडक (25 वर्षांखालील) क्रिकेट स्पर्धेतील पदार्पण दाहक ठरले. त्याची झळ हिमाचल प्रदेशला बसली आणि त्यांचा पहिला डाव दोनशे धावांच्या आत गारद झाला.  मोसमातील पहिलाच सामना खेळणाऱ्या शुभमने 5 विकेट टिपल्या. (Goa gets off to a strong start in the Colonel C K Naidu Trophy)

एलिट एफ गटातील चार दिवसीय सामन्याला मंगळवारी अळूर-बंगळूर येथे सुरवात झाली. शुभमने 42 धावांत 5 गडी बाद केले. त्याच्या धारदार माऱ्यासमोर हिमाचल प्रदेशची मध्यफळी कोसळली. त्यामुळे नाणेफेक जिंकून प्रथम फलंदाजी करताना त्यांचा पहिला डाव 193 धावांत संपुष्टात आला. नंतर वैभव गोवेकर (36) व मंथन खुटकर (नाबाद 42) यांनी दिलेल्या 75 धावांच्या सलामीमुळे गोव्याने पहिल्या दिवसअखेर 1 बाद 92 धावा केल्या. ते अजून 101 धावांनी मागे आहेत.

कर्नल सी. के. नायडू करंडक स्पर्धेतील पहिलाच सामना खेळणाऱ्या शुभमने संधीचा पूरेपूर लाभ उठविला. बिनबाद 41 सलामी दिलेल्या हिमाचल प्रदेशला पहिला दणका त्यानेच दिला. नंतर 8 धावांत 4 विकेट्स गमावल्यामुळे हिमाचल प्रदेशची 7 बाद 107 अशी दाणादाण उडाली. डावातील 28व्या षटकात दुसऱ्या व तिसऱ्या चेंडूवर सलग विकेट घेतल्यानंतर शुभमला हॅटट्रिकची संधीही प्राप्त झाली होती. कर्णधार एस. जी. अरोरा (36) याने तळाच्या फलंदाजांसह खिंड लढविली. त्यांच्या अखेरच्या तीन विकेटकडून धावसंख्येत 86 धावांची भर पडली. अरोरा व जयशोधन ठाकूर (32) यांनी आठव्या विकेटसाठी 43 धावांची भर टाकली.

लक्षवेधक शुभम

शुभम तारी याने 2019-20 मोसमात गोव्यातर्फे कुचबिहार करंडक (19 वर्षांखालील) स्पर्धेत छाप पाडली होती. सिक्कीम (5-31) व नागालँडविरुद्ध (5-19) त्याने डावात 5 गडी बाद करण्याची किमया साधली. गतमोसमात वयोगट स्पर्धा झाली नाही. यंदा त्याने रणजी करंडक स्पर्धेसाठी निवडलेल्या गोव्याच्या संघातील राखीव खेळाडूंत स्थान मिळविले होते. आता कर्नल सी. के. नायडू स्पर्धेच्या पदार्पणाच्या डावात 5 गडी बाद करण्याचा पराक्रम साधला.

संक्षिप्त धावफलक

हिमाचल प्रदेश, पहिला डाव ः 57.2 षटकांत सर्वबाद 193 (कुशल पाल 12, पी. जे. सिंग 35, एस. आर. पुरोहित 31, एस. जी. अरोरा 36, जयशोधन ठाकूर 32, एन. के. कंवर 30, ऋत्विक नाईक 16.2-3-48-1, शुभम तारी 11.5-3-42-5, मोहित रेडकर 12-2-48-2, दीपराज गावकर 12.1-3-31-0, विश्वंबर काहलोन 5-0-22-2).

गोवा, पहिला डाव ः 32 षटकांत 1 बाद 92 (वैभव गोवेकर 36, मंथन खुटकर नाबाद 42, कश्यप बखले नाबाद 12, रितिक कुमार 1-19).