खेलो इंडिया यूथ गेम्समध्ये गोव्याला पदकांची अपेक्षा

पणजी : हरियानातील पंचकुला येथे 4 ते 13 जून या कालावधीत होणाऱ्या चौथ्या खेलो इंडिया यूथ गेम्समध्ये गोव्याला पदकांची अपेक्षा आहे. स्पर्धेत गोव्याचे एकूण 63 खेळाडू 11 क्रीडाप्रकारांत भाग घेतील. (Goa expects medals in Khelo India Youth Games)

गोव्याचे खेळाडू तिरंदाजी, बॅडमिंटन, बॉक्सिंग, ज्युडो, नेमबाजी, जलतरण, मल्लखांब, योग, जिम्नॅस्टिक्स, वेटलिफ्टिंग, फुटबॉल या खेळांत सहभागी होतील. गोव्याच्या खेळाडूंसमवेत 19 अधिकारीही असतील.

क्रीडामंत्री गोविंद गावडे यांनी बांबोळी येथील ॲथलेटिक स्टेडियमवर झालेल्या कार्यक्रमात गोव्याच्या पथकाला शुभेच्छा दिल्या आहे. त्यांच्या हस्ते खेळाडूंना स्पर्धेसाठी खेळण्याचे साहित्य प्रदान करण्यात आले. यावेळी क्रीडा संचालक-गोवा क्रीडा प्राधिकरणाचे कार्यकारी संचालक अजय गावडे, दीपेश प्रियोळकर, शंकर गावकर, महेश रिवणकर व अन्य अधिकारी उपस्थित होते. गोवा क्रीडा प्राधिकरणाच्या सहाय्यक संचालक (प्रकल्प) मोनिका लोबो ई दोरादो या खेलो इंडिया गोवा विभागीय नोडल अधिकारी आहेत.