Blitz Chess Tournament : नीतिश बेलुरकरला लॅटव्हियात उपविजेतेपद; 11 फेऱ्यांतून साडेनऊ गुणांची कमाई

Goa Chess Player Nitish Belurkar : गोमंतकीय इंटरनॅशनल मास्टर (आयएम) बुद्धिबळपटू नीतिश बेलुरकर याला लॅटव्हियातील रिगा टेक्निकल युनिव्हर्सिटी ओपन ब्लिट्झ बुद्धिबळ स्पर्धेत उपविजेतेपद मिळाले. अकरा फेऱ्यांच्या या स्पर्धेत त्याने साडेनऊ गुणांची कमाई केली.

स्पर्धेत २९ देशांतील १५२ बुद्धिबळपटूंनी भाग घेतला होता. नीतिशचे सध्या २३५२ एलो गुण आहेत. २५५५ परफॉर्मन्स रेटिंगसह त्याने लॅटव्हियातील स्पर्धेत चमकदार खेळ केला. या कामगिरीने त्याने ५६.४ मानांकन गुणांचीही कमाई केली.

जॉर्जियन ग्रँडमास्टर बादूर जोवोव्हा याने साडेदहा गुणांसह स्पर्धेत विजेतेपद पटकावले. रौप्यपदक विजेत्या नीतिशनंतर लिथुआनियाचा ग्रँडमास्टर पॉलियस पुल्तिनेव्हिसियस याला नऊ गुणांसह तिसरा क्रमांक मिळाला.

उपविजेतेपदाच्या वाटचालीत नीतिशने प्रमुख खेळाडूंत नॉर्वेचा आयएम एल्हम अब्द्रलौफ, जपानी कँडिडेट मास्टर ट्राम थान्ह तू यांना नमविले, तर विजेता जोबोव्हा याला बरोबरीत रोखले. नीतिश आता रिगा टेक्निकल युनिव्हर्सिटीच्या क्लासिकल बुद्धिबळ स्पर्धेत खेळेल आणि नंतर अबुधाबी मास्टर्समध्ये सहभागी होईल.