पणजी: हैदराबाद एफसीने झुंजार खेळ केलेल्या एफसी गोवास 3-2 असे निसटते हरवून शनिवारी रात्री आठव्या इंडियन सुपर लीग (आयएसएल) फुटबॉल स्पर्धेत अग्रस्थान राखत उपांत्य फेरीकडे कूच केली. सामना बांबोळी येथील ॲथलेटिक स्टेडियमवर झाला. (Football Goa)
हैदराबादचा हा 17 लढतीतील नववा विजय ठरला. 32 गुणांसह ते पहिल्या स्थानी आहेत. एफसी गोवास 18 लढतीत आठवा पराभव पत्करावा लागला, त्यामुळे त्यांचे 18 गुण आणि नववा क्रमांक कायम राहिला. त्यांचे आव्हान यापूर्वीच संपुष्टात आले आहे. आयएसएल इतिहासात एफसी गोवाविरुद्ध (FC Goa) सहा लढतीत हैदराबादने नोंदविलेला हा पहिलाच विजय ठरला.
हैदराबादने (Hyderabad) सामन्याच्या 25 व्या मिनिटास नायजेरियन बार्थोलोम्यू ओगबेचे याच्या भेदक हेडिंगमुळे आघाडी मिळविली. नंतर 35 व्या मिनिटास मोसमातील वैयक्तिक आठवा गोल नोंदवत स्पॅनिश होर्गे ओर्तिझ याने एफसी गोवासाठी बरोबरीचा गोल केला. 41 व्या मिनिटास ओगबेचे याचा डाव्या पायाचा सणसणीत फटका अडविण्यासाठी एफसी गोवाचा गोलरक्षक धीरज सिंग झेपावला, पण त्याला अपयश आल्याने हैदराबादने विश्रांतीपूर्वी 2-1 अशी आघाडी प्राप्त केली. 70व्या मिनिटास ब्राझीलियन जुवाव व्हिक्टर याने हैदराबादची स्थिती आणखीनच बळकट करणारा गोल केला. 73 व्या मिनिटास बदली खेळाडू देवेंद्र मुरगावकरच्या वेगवान हेडिंगवर चेंडू रोखणे हैदराबादचा गोलरक्षक लक्ष्मीकांत कट्टीमनी याला शक्य झाले नाही, त्यामुळे एफसी गोवाची पिछाडी 2-3 अशी कमी झाली.
ओगबेचे याचा ‘अव्वल’ धमाका
आयएसएल स्पर्धेत, तसेच यंदा सर्वाधिक गोल करण्याचा दुहेरी धमाका हैदराबादचा आघाडीपटू बार्थोलोम्यू ओगबेचे याने शनिवारी केला. एफसी गोवाविरुद्ध हैदराबादला त्याने आघाडी मिळवून दिल्यानंतर त्याच्या खाती स्पर्धेत पन्नास गोल जमा झाले आणि त्याने बंगळूर एफसीचा सुनील छेत्री याला गाठले. नंतर विश्रांतीपूर्वी त्याने आणखी एक गोल करून आयएसएलमध्ये (ISL) सर्वाधिक 51 गोल नोंदविण्याचा मान मिळविला. स्पर्धेत यंदा त्याने 16 सामन्यांत 16 गोल केले असून हा 37 वर्षीय आघाडीपटू गोल्डन बूटच्या शर्यतीत खूप पुढे आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
