एफसी गोवा संघाची स्पॅनिश पसंती कायम

पणजी: आगामी फुटबॉल मोसमासाठी एफसी गोवाची स्पॅनिश खेळाडूंनाच पसंती राहणार आहे. त्यांनी अनुभवी एदू बेदियाला संघात कायम राखले असून बाकी परदेशी खेळाडूंत स्पेनमधील फुटबॉलपटूंना प्राधान्य असेल. नवे प्रशिक्षक कार्लोस पेनया यांच्या मार्गदर्शनाखाली 33 वर्षी एदू बेदिया एफसी गोवातर्फे 2022-23 मध्ये सलग सहावा आयएसएल मोसम खेळेल.

(FC Goa team's Spanish preference maintained)

गतमोसमात करारबद्ध असलेल्या बाकी पाच परदेशी खेळाडूंना एफसी गोवाने मुक्त केले आहे. मागील वेळेसह एकूण सहा परदेशींत पाच खेळाडू स्पॅनिश होते.

गतमोसमात केरळा ब्लास्टर्सतर्फे आयएसएल स्पर्धेत खेळलेला स्पॅनिश आघाडीपटू अल्वारो वाझकेझ एफसी गोवातर्फे खेळणार हे उघड असून लवकरच याबाबत अधिकृत घोषणा अपेक्षित आहे. याशिवाय प्रशिक्षक पेनया यांनी नव्या मोसमासाठी 29 वर्षीय मध्यरक्षक इकेर ग्वारोत्शेना व 35 वर्षीय बचावपटू मार्क व्हालेंते या स्पॅनिश फुटबॉलपटूंची नावे संघ व्यवस्थापनास सुचविल्याची माहिती आहे. यासंदर्भात ऑनलाईन बैठकही झाली आहे. दोन्ही नव्या खेळाडूंच्या कराराची अधिकृत घोषणा संघातर्फे केली जाईल.