Euro cup: इटलीची अंतिम फेरीत धडक, तर कोपामध्ये ब्राझील- अर्जेंटीना आमने सामने

युरो कपचा (Euro cup) थरार आता अंतिम टप्प्यात येऊन पोहोचला आहे. काल झालेल्या रोमांचक सामन्यात कट्टर प्रतिस्पर्धी इटलीने (Italy) स्पेनला (Spain) पेनल्टी शूटआऊटमध्ये 4-2 असे हरवत युरो कपच्या अंतिम (Final) सामन्यात धडक मारली आहे. कालचा दिवस ‘सुपर फुटबॉल डे’ सारखाच होता. युरो कपमध्ये इटलीने स्पेनला हरवत अंतिम सामन्यात धडक मारली तर दुसरीकडे कोपा अमेरिकन फुटबॉल (Football) स्पर्धेत फुटबॉलचे हिरो अशी ओळख असलेल्या ब्राझीलच्या (Brazil) संघाने पेरुला 1-0 अशी मात देत कोपा अमेरिकन स्पर्धेच्या अंतिम फेरीत स्थान मिळविले आहे.

इटली आणि स्पेन या कट्टर प्रतिस्पर्ध्यामधील उपांत्य लढत शेवटपर्यंत चाहत्यांचा श्वास रोखून धरणारी अशी होती. सामन्यातील 90 मिनिटांत दोन्ही संघांनी आपले वर्चस्व राखत 1-1 अशी बरोबरी साधली. त्यानंतर अतिरिक्त वेळात देखील दोन्ही संघांनी आपला खेळ उंचावत ही बरोबरी कायम ठेवली. त्यामुळे हा खेळ पेनल्टी शूटआऊटमध्ये गेला. तेथे स्पेन इटलीवर मात करणार असे चित्र पहिल्या दोन पेनल्टी किकमध्ये दिसत होते. 2008 च्या युरो कप स्पर्धेत स्पेनने इटलीला पेनल्टी शूटआऊटमध्ये पराभूत केले होते.

पण यावेळी आलेली संधी स्पेनने सोडली आधी डॅनी ओलमो आणि नंतर मोराटाने पेनल्टी किक मिस केल्याने इटलीचा विजय पक्का झाला आणि इटलीने स्पेनवर 4-2 असा विजय मिळवत अंतिम फेरीत धडक मारली आहे. इटलीच्या या विजयामुळे 1968 पासून स्वप्नवत असलेला युरो कप आता त्यांच्यापासून एका पावलावर आहे. आज इंग्लंड आणि डेन्मार्क यांच्यामधील विजेत्या संघाला अंतिम सामन्याचे तिकीट मिळेल.

ब्राझील विरुध्द अर्जेंटीना यांच्यात कोपा स्पर्धेची अंतिम लढत

युरोसोबतच फुटबॉलमध्ये दुसरीकडे कोपा अमेरिकन स्पर्धेचा थरार रंजक वळणार पोहोचला आहे. या स्पर्धेच्या अंतिम सामन्यात फुटबॉल विश्वात अधिराज्य गाजविणारे दोन संघ समोरा समोर उभे ठाकणार आहेत. या स्पर्धेत काल ब्राझीलने पेरुला 1-0 अशी धूळ चारत कोपा स्पर्धेची अंतिम फेरी गाठली आहे. या आधीच अर्जेंटीनाने स्पर्धेच्या अंतिफेरीत स्थान मिळविले आहे. त्यामुळे आता ब्राझील विरुध्द अर्जेंटीना यांच्यात कोपा स्पर्धेचा अंतिम सामना रंगणार आहे.