ICC ODI Cricket World Cup 2023, India vs England:
भारत विरुद्ध इंग्लंड संघात रविवारी (29 ऑक्टोबर) वनडे वर्ल्डकप 2023 स्पर्धेतील सामना होत आहे. लखनऊमधील भारतरत्न श्री अटल बिहारी वाजपेयी एकाना क्रिकेट स्टेडियमवर होत असलेल्या या सामन्यात भारताने इंग्लंडसमोर विजयासाठी 230 धावांचे आव्हान ठेवले आहे.
या सामन्यात इंग्लंडने नाणेफेक जिंकून प्रथम गोलंदाजी करण्याचा निर्णय घेतला होता. त्यामुळे भारतीय संघ प्रथम फलंदाजीसाठी उतरला होता. भारताने प्रथम फलंदाजी करताना 50 षटकात 9 बाद 229 धावा केल्या.
लक्षात घेण्यासारखी गोष्ट अशी की भारतीय संघ या स्पर्धेत पहिल्यांदाच प्रथम फलंदाजीसाठी उतरला. यापूर्वी या स्पर्धेत खेळलेल्या पहिल्या पाचही सामन्यात भारताने प्रथम गोलंदाजी केली होती.
दरम्यान, या सामन्यात प्रथम फलंदाजीसाठी उतरलेल्या भारताकडून शुभमन गिल आणि रोहित शर्मा यांनी सलामीला फलंदाजी केली. मात्र, गिल चौथ्याच षटकात 9 धावा करून बाद झाला. त्याला ख्रिस वोक्सने त्रिफळाचीत केले.
त्यापाठोपाठ 7 व्या षटकात डेव्हिड विलीने विराट कोहलीचा अडथळा दूर केला. विराट 9 चेंडू खेळूनही एकही धाव न करतान विलीच्या गोलंदाजीवर बेन स्टोक्सकडे झेल देत बाद झाला.पाठोपाठ 12 व्या षटकात वोक्सने श्रेयस अय्यरलाही 4 धावांवर माघारी पाठवले.
पण त्यानंतर रोहित शर्माला केएल राहुलने चांगली साथ दिली. या दोघांमध्ये ९१ धावांची भागीदारी झाली. मात्र, खेळपट्टीवर स्थिरावल्यानंतर केएल राहुलची विकेट गेली. त्याला 39 धावांवर विलीनेच बाद केले.
त्यानंतर काही 37 व्या षटकात शतकाकडे वाटचाल करणाऱ्या रोहित शर्मालाही आदिल राशीदने बाद करत भारताला मोठा धक्का दिला. रोहित शर्माने 101 चेंडूत 10 चौकार आणि 3 षटकारांसह 87 धावांची खेळी केली.
रोहित बाद झाल्यानंतर सुर्यकुमारने डाव पुढे नेला. मात्र, एका बाजूने तो फलंदाजी करत असताना रविंद्र जडेजाला राशीदने 8 धावांवर पायचीत केले, तर मार्क वूडने मोगम्मद शमीला 1 धावेवर बाद केले.
त्यानंतर जसप्रीत बुमराहने सूर्यकुमारला साथ देण्याचा प्रयत्न केला, मात्र त्यांची जोडी आणखी शेवटी धोकादायक ठरण्यापूर्वीच सूर्यकुमारला विलीने 47 व्या षटकात पॅव्हेलियनमध्ये पाठवले. सूर्यकुमार 49 धावांवर खेळत असताना मोठा फटका मारण्याच्या प्रयत्ना ख्रिस वोक्सकडे झेल देत बाद झाला.
पण त्यानंतर जसप्रीत बुमराह आणि कुलदीप यादव यांनी भारतीय संघ सर्वबाद होणार नाही याची दक्षता घेतली, मात्र अखेरच्या चेंडूवर बुमराह 16 धावांवर धावबाद झाला. कुलदीप 9 धावांवर नाबाद राहिला.
इंग्लंडकडून गोलंदाजी करताना डेव्हिड विलीने सर्वाधिक 3 विकेट्स घेतल्या. तसेच ख्रिस वोक्स आणि आदील राशीदने प्रत्येकी 2 विकेट्स घेतल्या, तर मार्क वूडने 1 विकेट घेतली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
