पेडण्यातील बुद्धिबळात लढतीपूर्वीच ‘माघार’

पणजी: पेडणे तालुका बुद्धिबळ संघटनेच्या उपाध्यक्ष व सचिवपदाची निवडणूक रविवारी होणार होती, पण प्रतिस्पर्धी उमेदवारांनी संबंधित प्रक्रियेतून माघार घेतल्याने मतदान होऊ शकले नाही. एकंदरीत या तालुक्याची संघटना बिनविरोध ठरली. (Election of Vice President and Secretary of Pernem Chess Association was held uncontested)

पेडणे तालुका बुद्धिबळ संघटनेच्या निवडणुकीत 27 मतदार होते, त्यामुळे कोरोना विषाणू महामारी मार्गदर्शक शिष्टाचारानुसार या संघटनेच्या निवडणुकीस परवानगी होती. उपाध्यक्षपदासाठी मावळते अध्यक्ष वसंत नाईक व चंद्रकांत सावळ देसाई यांच्यात, तर सचिवपदासाठी विजय परब व सुशांत नाईक यांच्यात थेट लढत होती. अध्यक्ष प्रभाकर शेट्ये यांच्यासह बाकी सर्व पदाचे उमेदवार पूर्वीच बिनविरोध ठरले होते.

गोवा बुद्धिबळ संघटनेचे सचिव किशोर बांदेकर यांनी दिलेल्या माहितीनुसार, निवडणूक बैठकीपूर्वीच वसंत नाईक व विजय परब यांनी सभात्याग केला. त्यानंतर चंद्रकांत सावळ देसाई व सुशांत नाईक यांची निवड बिनविरोध झाल्याचे जाहीर करण्यात आले आणि तसा अहवाल संघटनेचे मावळते सचिव सुभाष पार्सेकर यांनी गोवा बुद्धिबळ संघटनेस सादर केला.

पेडणे तालुका बुद्धिबळ संघटनेची निवडणूक प्रक्रिया पूर्ण झाल्यामुळे आता बारा तालुका संघटनांपैकी फक्त तिसवाडी तालुका व सासष्टी तालुका संघटनेची निवडणूक बाकी आहे. या दोन्ही संघटनांचा कार्यकाळ 30 जून रोजी संपत आहे. राज्य संघटनेची नव्या कालावधीसाठी येत्या 30 जुलै रोजी निवडणूक नियोजित आहे.

पेडणे तालुका बुद्धिबळ संघटनेच्या नव्या व्यवस्थापकीय समितीचा कार्यकाळ 2021 ते 2025 पर्यंत आहे.

पदाधिकारी असे:

1. अध्यक्ष : प्रभाकर शेट्ये,

2. सचिव : सुशांत नाईक,

3. खजिनदार : प्रदीप पटेकर,

4. उपाध्यक्ष : चंद्रकांत सावळ देसाई,

5. संयुक्त सचिव : उमेश नाईक,

6. व्यवस्थापकीय समिती सदस्य : तुकाराम शेट्ये, सुहास गावडे, मनाली पार्सेकर, राजेंद्र शेटगावकर.