जीएफए फुटबॉल स्पर्धेत साळगावकरला उपविजेतेपद, एफसी गोवास तिसरे स्थान

पणजी : जीएफए 20 वर्षांखालील तासा गोवा फुटबॉल स्पर्धेत साळगावकर एफसीने उपविजेतेपद मिळविले, तर एफसी गोवास तिसऱ्या स्थानी समाधान मानावे लागले. शनिवारी म्हापसा येथील धुळेर स्टेडियमवर साळगावकर संघाने 2-1 फरकाने निसटता विजय प्राप्त केला. स्पर्धेचे विजेतेपद यापूर्वीच धेंपो स्पोर्टस क्लबने पटकाविले आहे. (GCA Football Competition)

एफसी गोवा संघाने सामन्याच्या तिसऱ्याच मिनिटास आघाडी घेतली. मलिकजान कालेगर याने शानदार गोल केला. मात्र नंतर साळगावकर एफसीने मुसंडी मारत पिछाडी भरून काढली. त्यामुळे आघाडी घेतल्याचा एफसी गोवाचा आनंद जास्त काळ टिकला नाही. सहाव्या मिनिटास शुभम शिरवईकर याने साळगावकरला बरोबरी साधून दिली. विश्रांतीपूर्व साळगावकर एफसीला पेनल्टी फटका मिळाला. 45+2व्या मिनिटास उमंग गायकवाडने स्पॉट किकवर अचूक फटका मारत संघाला आघाडी मिळवून दिली. हाच गोल अखेरीस निर्णायक ठरला.

सामन्याच्या उत्तरार्धात एफसी गोवास संधी होत्या, परंतु त्यांना यश प्राप्त झाले नाही. साळगावकर एफसीचा गोलरक्षक विशाल याची दक्ष कामगिरी मौल्यवान ठरली. त्याने 59व्या मिनिटास लालरेमरुआता याचा फटक, तर 66व्या मिनिटास जोव्हियल डायसचे हेडिंग उधळून लावले. त्यानंतरही एफसी गोवाचे खेळाडू विशालचा बचाव भेदू शकले नाहीत. त्यामुळे साळगावकरच्या विजयावर शिक्कामोर्तब झाले.