मेव्हनच्या गोलमुळे एफसी गोवाची घोडदौड

पणजी: युवा स्ट्रायकर मेव्हन डायस याने पूर्वार्धात नोंदविलेल्या गोलमुळे FC गोवा डेव्हलपमेंटल संघाने गोवा प्रोफेशनल लीग (Goa Professional League) फुटबॉल स्पर्धेत शुक्रवारी सलग दुसरा विजय नोंदविला. त्यांनी पणजी फुटबॉलर्सला 1-0 फरकाने निसटते हरविले.

म्हापसा येथील धुळेर स्टेडियमवर (stadium) झालेल्या या लढतीत मेव्हनने 17 व्या मिनिटास केलेला गोल निर्णायक ठरला. मेव्हन हा मूळचा एफसी गोवा 18 वर्षांखालील संघातील खेळाडू. यंदा मोसमाच्या सुरवातीस त्याला डेव्हलपमेंटल संघात बढती मिळाली. निवड सार्थ ठरविताना या युवा स्ट्रायकरने सलग दुसऱ्या लढतीत गोल नोंदविला. मेव्हनने आदित्य साळगावकरच्या असिस्टवर प्रतिस्पर्धी गोलरक्षकास गुंगारा दिला.

FC गोवाचे आता दोन लढतीतून सहा गुण झाले आहेत. अव्वल स्थानावरील वास्को क्लबच्या तुलनेत त्यांचा एक गुण कमी आहे. पणजी फुटबॉलर्सला तीन लढतीत दुसरा पराभव पत्करावा लागला. त्यामुळे त्यांच्या खाती एक गुण कायम राहिला. पूर्वार्धातील पिछाडीनंतर पणजी फुटबॉलर्सने उत्तरार्धात बरोबरीसाठी जोरदार प्रयत्न केले, परंतु संधी साधणे त्यांना जमले नाही.

स्पोर्टिंग-चर्चिल ब्रदर्स सामना आज

गोवा प्रोफेशनल लीग फुटबॉल स्पर्धेत म्हापसा येथील धुळेर स्टेडियमवर गतविजेते स्पोर्टिंग क्लब द गोवा आणि चर्चिल ब्रदर्स यांच्यात लढत होईल. स्पोर्टिंगच्या खाती 3 लढतीतून 5 गुण असून चर्चिल ब्रदर्सने 2 लढतीतून 4 गुण नोंदविले आहेत.