Cheteshwar Pujara meet Team India ahead of 3rd ODI against Australia:
भारत विरुद्ध ऑस्ट्रेलिया यांच्यात वनडे मालिकेतील तिसरा सामना बुधवारी (27 सप्टेंबर) खेळला जात आहे. हा सामना राजकोटमधील सौराष्ट्र क्रिकेट असोसिएशन स्टेडियमवर खेळला जात आहे. दरम्यान, या सामन्यासाठी चेतेश्वर पुजारा देखील स्टेडियममध्ये उपस्थित होता.
पुजारा नुकताच काउंटी क्रिकेट खेळल्यानंतर भारतात परतला आहे. दरम्यान, ऑस्ट्रेलिया विरुद्धच्या तिसऱ्या सामन्यापूर्वी पुजारा भारतीय खेळाडूंनाही भेटला. भारतीय खेळाडू मैदानात सराव करत असताना पुजारा मैदानात आला होता.
यावेळी भारतीय संघाचे मुख्य प्रशिक्षक राहुल द्रविड त्याच्याशी बराच वेळ चर्चा करताना दिसले. त्याचबरोबर विराट कोहली, रोहित शर्मा, रविंद्र जडेजा, श्रेयस अय्यर असे अनेक भारतीय संघातील खेळाडू त्याला भेटले. यावेळी ते त्याच्याबरोबर मस्करी करतानाही दिसले.
हा व्हिडिओ बीसीसीआयने शेअर केला आहे. या व्हिडिओला कॅप्शन दिले आहे की 'तिसऱ्या वनडेसाठी कोण उपस्थित आहे पाहा. भारतीय संघाने स्थानिक खेळाडू पुजाराची भेट घेतली.' राजकोटचे मैदान हे पुजाराचे घरचे मैदान आहे.
दरम्यान, पुजारा सध्या भारतीय कसोटी संघातून बाहेर आहे. त्याला वेस्ट इंडिज दौऱ्यासाठी भारताच्या कसोटी संघात संधी मिळाली नव्हती. पण असे असताना त्याने काउंटी क्रिकेट खेळण्याला प्राधान्य दिले.
त्याने यंदा काउंटी क्रिकेटमध्ये ससेक्स संघाने नेतृत्वही केले. त्याने या संघाकडून या हंगामात शानदार कामगिरीही केली. त्याने 8 सामन्यांमध्ये 54.08 च्या सरासरीने 649 धावा केल्या. यात त्याच्या 3 शतकांचा आणि 2 अर्धशतकांचा समावेश आहे.
दरम्यान, भारत विरुद्ध ऑस्ट्रेलिया यांच्यातील तिसऱ्या वनडेबद्दल सांगायचे झाल्यास या सामन्यात ऑस्ट्रेलियाने नाणेफेक जिंकून प्रथम फलंदाजी करण्याचा निर्णय घेतला होता. त्यामुळे प्रथम फलंदाजी करताना ऑस्ट्रेलियाने 50 षटकात 7 बाद 352 धावा केल्या.
ऑस्ट्रेलियाकडून मिचेल मार्शने सर्वाधिक 96 धावांची खेळी केली. तसेच स्टीव्ह स्मिथने 74 धावांची खेळी केली, तर डेव्हिड वॉर्नरने 56 धावा केल्या. त्याचबरोबर मार्नस लॅब्युशेन 72 धावा करून बाद झाला.
भारताकडून भारताकडून जसप्रीत बुमराहने सर्वाधिक 3 विकेट्स घेतल्या. तसेच कुलदीप यादवने 2 विकेट्स घेतल्या, तर मोहम्मद सिराज आणि प्रसिद्ध कृष्णा यांनी प्रत्येकी 1 विकेट घेतली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
