Chennai Super Kings Celebration After IPL 2023 Title Win: इंडियन प्रीमियर लीग 2023 स्पर्धेचे विजेतेपद चेन्नई सुपर किंग्सने जिंकले आहे. अहमदाबादच्या नरेंद्र मोदी स्टेडियमवर झालेल्या अंतिम सामन्याच चेन्नईने गुजरात टायटन्सला 5 विकेट्सने पराभूत केले.
या सामन्यात चेन्नई सुपर किंग्ससमोर पावसाच्या अडथळ्यामुळे डकवर्थ लुईस नियमानुसार १५ षटकात 171 धावांचे आव्हान ठेवण्यात आले होते. या आव्हानाचा पाठलाग करताना अखेरच्या दोन चेंडूत चेन्नईला 10 धावांची गरज होती.
यावेळी चेन्नईकडून रविंद्र जडेजा फलंदाजी करत होता. तसेच गोलंदाजी गुजरातकडून मोहित शर्मा करत होता. जडेजाने या दबावाच्या परिस्थितीतही षटकार आणि मग विजयी चौकार मारला. यासह चेन्नईने हा सामना जिंकत पाचव्यांदा आयपीएल विजेतेपदावर नाव कोरले.
जडेजाने विजयी चौकार मारल्यानंतर मात्र चेन्नईच्या गोटात आनंदाचे वातावरण पसरले होते. जडेजाने चौकार मारल्यानंतर तो बॅट उंचावत मैदानात धावत होता. त्याचवेळी चेन्नई संघातील सदस्यांनी मैदानात धाव घेतली.
यावेळी मात्र एमएस धोनी डगआऊटमध्येच टाळ्या वाजवत होता. यावेळी चेन्नईतील अन्य सदस्यांनी त्याची गळाभेट घेतली. त्यानंतर धोनीनेही सेलिब्रेशनमध्ये सामील झाला. याचवेळी त्याने आनंदाने जडेजालाला कडेवरही घेतले. यावेळी चेन्नई संघातील सर्वच जण खूप आनंदाने सेलिब्रेशन करत होते. चेन्नईच्या या सेलिब्रेशनचे व्हिडिओ सध्या व्हायरल होत आहे.
या सामन्यात गुजरातने वृद्धिमान साहा (54) आणि साई सुदर्शन (96) यांच्या अर्धशतकाच्या जोरावर 20 षटकात 4 बाद 214 धावा केल्या होत्या. पण नंतर चेन्नईच्या फलंदाजीवेळी सुरुवातीलाच पाऊस आल्याने डकवर्थ लुईसनुसार चेन्नईसमोर 15 षटकात 171 धावांचे आव्हान ठेवण्यात आले होते.
चेन्नईकडून रविंद्र जडेजा 6 चेंडूत 15 धावांवर नाबाद राहिला. तसेच शिवम दुबे 21 चेंडूत 32 धावांवर नाबाद राहिला. याशिवाय चेन्नईकडून डेव्हॉन कॉनवेने सर्वाधिक 47 धावा केल्या. तसेच ऋतुराज गायकवाड (26), अजिंक्य रहाणे (27) आणि अंबाती रायुडू (19) यांनीही छोटेखानी महत्त्वाच्या खेळी केल्या. गुजरातकडून मोहित शर्माने 3 आणि नूर अहमदने 2 विकेट्स घेतल्या.
दरम्यान, चेन्नई सुपर किंग्सचे हे पाचवे विजेतेपद ठरले आहे. त्यांनी यापूर्वी 2010, 2011, 2018 आणि 2021 या हंगामात विजेतेपद जिंकले आहे. यासह चेन्नईने मुंबईच्या पाच आयपीएल विजेतेपद जिंकण्याच्या विक्रमाशी बरोबरी केली आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.