Novak Djokovic vs Carlos Alcaraz: 20 वर्षांच्या अल्कारेजने हरवल्यावर जोकोविच म्हणतोय, 'त्याच्याकडे फेडरर, राफा अन् माझे...'

Novak Djokovic praise Carlos Alcaraz After Wimbledon 2023 Final : रविवारी सार्बियाचा टेनिसपटू नोवाक जोकोविचला विम्बल्डन 2023 स्पर्धेच्या अंतिम सामन्यात पराभवाचा धक्का बसला. स्पेनच्या अव्वल मानांकित कार्लोस अल्कारेजने त्याला पराभूत केले.

20 वर्षांच्या अल्कारेजने अंतिम सामन्यात जोकोविचला ५ सेटमध्ये कडवी झुंज देत  1-6, 7-6(6), 6-1, 3-6, 6-4 असे पराभूक केले. विशेष म्हणजे गेल्या २० वर्षांच्या कालावधीत नोव्हाक जोकोविच, रॉजर फेडरर, अँडी मरे आणि राफेल नदाल यांच्याव्यतिरिक्त विजेता विम्बल्डनला मिळाला आहे. त्यामुळेच अल्कारेजचा हा विजय विशेष मानला जात आहे.

त्याचे या विजेतेपदाबद्दल अंतिम सामन्यातील प्रतिस्पर्धी जोकोविचनेही तोंडभरून कौतुक केले आहे.

अंतिम सामन्यानंतर अल्कारेजबद्दल बोलताना जोकोविच म्हणाला, 'त्याच्याकडे मानसिक कणखरता आहे. तसेच 20 वर्षांच्या वयाच्या दृष्टीने तो बराच परिपक्वही आहे. त्याच्याकडे प्रतिस्पर्धा करण्याची, लढण्याची आणि अविश्वसणीय बचावात्मक खेळाची स्पॅनिश मानसिकता आहे, जशी गेल्या अनेक वर्षात मी राफाबाबत पाहिली आहे.'

'मला वाटते की त्याच्याकडे चांगले स्लायडिंग बॅकहँडचे फटके आहेत, जे काहिसे माझ्यासारखे आहेत. दोन्ही हातांनी बॅकहँड्स, बचाव, परिस्थितीशी जुळवून घेण्याची क्षमता, त्याच्याकडे आहे. मला वाटते माझ्या स्वत:ची ही अनेकवर्षे ताकद होती. पण त्याच्याकडेही ती आहे.'

'प्रामाणिकपणे सांगायचे, तर मी त्याच्यासारख्या खेळाडूविरुद्ध कधीही खेळलो नव्हतो. रॉजर आणि राफाकडे नक्कीच त्यांची ताकद आणि कमजोरी आहे. कार्लोस परिपूर्ण खेळाडू आहे. माझ्यामते परिस्थितीशी जुळवून घेण्याची क्षमता ही त्याच्यासाठी दीर्घकाळ खेळत राहण्यासाठी आणि यशस्वी कारकिर्द घडवण्याची गुरुकिल्ली आहे.'

याशिवाय जोकोविचने अल्कारेजचे आणि त्याच्या टीमचेही विजेतेपदाबद्दल अभिनंदन केले. त्याचबरोबर जोकोविच कुटुंबाचे आणि त्याच्या टीमचे आभार मानताना मात्र भावनिक झाला होता. त्याचे डोळेही त्यावेळी पाणावले.

अल्कारेजची स्वप्नपूर्ती

दरम्यान, विजेतेपद जिंकल्यानंतर अल्कारेजने म्हटले की हा त्याच्यासाठी स्वप्नपूर्ती करणारा क्षण आहे. तसेच त्याने त्याच्या टीमचेही कौतुक केले आहे.

अल्कारेजसाठी हे दुसरे ग्रँडस्लॅम विजेतेपद आहे. यापूर्वी त्याने गेल्यावर्षी अमेरिकन ओपन स्पर्धेत विजेतेपद मिळवले होते. दरम्यान, या विजेतेपदानंतर अल्कारेज अव्वल क्रमांकावर कायम राहाणार आहे.