नागोवा मैदानावर बंगळूर एफसीचे विजयी पंचक

पणजी: बंगळूर एफसीने रिलायन्स फाऊंडेशन डेव्हलपमेंट लीग फुटबॉल स्पर्धेत सलग पाचवा विजय नोंदविला. मंगळवारी त्यांनी नागोवा येथील मैदानावर चेन्नईयीन एफसीला ३-० फरकाने सहजपणे हरविले (Bangalore FC's winning five at Nagova ground )

बाणावली येथील मैदानावर आरएफ यंग चँप्सने जमशेदपूर एफसीला १-० फरकाने पराभवाचा धक्का दिला. निर्णायक गोल 16 व्या मिनिटास सी. के. रशीद याने थेट फ्रीकिक फटक्यावर केला. यंग चँप्सचा हा दुसरा विजय असून त्यांचे पाच लढतीतून सात गुण झाले आहेत. ते आता सलग तीन सामने अपराजित आहेत. जमशेदपूरला दुसरा पराभव पत्करावा लागला. त्यामुळे पाच लढतीनंतर त्यांचे सात गुण कायम राहिले.

लास्टबॉर्न मॉफनियांग बंगळूर एफसीच्या विजयाचा शिल्पकार ठरला. त्याने दोन गोल केले. त्याने अनुक्रमे २५ व ६९व्या मिनिटास चेंडूला नेटची अचूक दिशा दाखविली. अन्य एक गोल 68 व्या मिनिटास बेके ओरम याने केला. सलग पाच सामने जिंकल्यामुळे बंगळूरचे सर्वाधिक 15 गुण झाले आहेत. स्पर्धेतील तिसऱ्या पराभवामुळे चेन्नईयीनचे पाच लढतीनंतर दोन गुण कायम राहिले.