Asia Cup 2022: भारताला मोठा धक्का, रवींद्र जडेजा दुखापतीमुळे आशिया चषक स्पर्धेतून बाहेर

Asia Cup 2022: आशिया कप 2022 मध्ये भारताने पहिले दोन सामने जिंकून सुपर-4 मध्ये स्थान मिळवले आहे. यातच आता टीम इंडिया आपला पुढचा सामना पाकिस्तान आणि हाँगकाँग यांच्यातील विजेत्याविरुद्ध खेळणार आहे, मात्र रविवारी होणाऱ्या सामन्यापूर्वी भारताला मोठा धक्का बसला आहे. संघाचा स्टार अष्टपैलू खेळाडू रवींद्र जडेजा गुडघ्याच्या दुखापतीमुळे आशिया कपमधून बाहेर पडला आहे. जडेजाच्या जागी अक्षर पटेलचा संघात समावेश करण्यात आला आहे. बीसीसीआयने प्रसिद्धीपत्रक जारी करुन या वृत्तास दुजोरा दिला आहे.

बीसीसीआयने प्रसिद्धीपत्रक जारी करुन म्हटले आहे की, "सध्या सुरु असलेल्या आशिया चषकात निवड समितीने रवींद्र जडेजाच्या (Ravindra Jadeja) जागी अक्षर पटेलची निवड केली आहे. जडेजाच्या उजव्या गुडघ्याला दुखापत झाल्याने तो स्पर्धेतून बाहेर पडला आहे. सध्या तो बीसीसीआयच्या (BCCI) वैद्यकीय पथकाच्या देखरेखीखाली आहे. त्याच्या जागी अक्षर पटेलची यापूर्वी संघातील एक स्टँडबाय म्हणून निवड करण्यात आली होती. त्यामुळे तो लवकरच संघात सामील होणार आहे.''

दुसरीकडे, स्पर्धेच्या मध्यातच रवींद्र जडेजाला दुखापत होणे ही भारतासाठी (India) चांगली बातमी नाही. जडेजा सध्या शानदार फॉर्ममध्ये आहे. त्याने पाकिस्तानविरुद्धच्या (Pakistan) हाय-व्होल्टेज सामन्यात 35 धावांची मॅच-विनिंग इनिंग खेळी खेळली. हाँगकाँगविरुद्धच्या सामन्यात त्याने 4 षटकात 15 धावा देत 1 बळी घेतला.

तसेच, ऑस्ट्रेलियात होणाऱ्या T20 विश्वचषक स्पर्धेच्या दृष्टीकोनातूनही पाहिल्यास भारताला हा मोठा धक्का आहे. कारण आशिया कप संपल्यानंतर काही दिवसांतच बीसीसीआय जागतिक संघाची घोषणा करणार आहे. मात्र, जडेजाची दुखापत किती गंभीर आहे, हे अद्याप निश्चित झालेले नाही.