Chess tournament : 9 पैकी 9 गुण; अमेय अवदीला रॅपिड बुद्धिबळ स्पर्धेचे विजेतेपद

Chess tournament : गोव्याचा इंटरनॅशनल मास्टर अमेय अवदी याने धडाकेबाज खेळ करताना सर्व नऊही डाव जिंकून व्यंकटेश आणि सुमती शानभाग स्मृती अखिल भारतीय रॅपिड बुद्धिबळ मानांकन स्पर्धेत विजेतेपद मिळविले. वर्चस्व अबाधित राखताना त्याने शेवटच्या फेरीत रुबेन कुलासो याच्यावर मात केली.

मंदार लाड व इंटरनॅशनल मास्टर नीतिश बेलुरकर या गोमंतकीय बुद्धिबळपटूंचे समान आठ गुण झाले. टायब्रेकर गुणांत मंदारला उपविजेतेपद मिळाले, तर नीतिशला तिसरा क्रमांक मिळाला. मुरगाव तालुका बुद्धिबळ संघटनेने गोवा बुद्धिबळ अस्थायी समितीच्या मान्यतेने मांगोर हिल-वास्को येथील सेंट तेरेझा हायस्कूल सभागृहात स्पर्धा घेतली. शानभाग कुटुंबीय प्रतिष्ठानतर्फे स्पर्धा पुरस्कृत करण्यात आली होती.

रुबेन कुलासोला चौथा, ग्रँडमास्टर आर. आर. लक्ष्मण याला पाचवा, तर अनिरुद्ध देशपांडे, इंटरनॅशनल मास्टर बाल सुब्रम्हण्यम, सौरव खेर्डेकर, वसंत नाईक, एम. विनय कुमार यांना अनुक्रमे सहावा ते दहावा क्रमांक मिळाला. हरिसुया गुंडेपुडी, सोहन दातार, के. एन. गोपाळ, कोनाथन स्नेहिल, अनिरुद्ध पार्सेकर, पार्थ साळवी, देवेश नाईक, दत्ता कांबळी, विश्वेश कोचरेकर, रशियन दिमित्री बेझस्त्राखोव यांना अनुक्रमे 11वा ते 20वा क्रमांक मिळाला.

राज्यसभा खासदार विनय तेंडुलकर, वास्कोचे आमदार कृष्णा (दाजी) साळकर, सुकांत शानभाग, किशोर बांदेकर, मुकुंद कांबळी, पुंडलिक नाईक यांच्या उपस्थितीत बक्षीस वितरण झाले. मुकेश अधिया यांनी कार्यक्रमाचे सूत्रसंचालन केले.