Zombie Virus: जग पुन्हा कोरोनासारख्या नव्या व्हायरसच्या विळख्यात

Zombie Virus: कोरोना महामारीच्या विळख्यातून जग आता कुठे सावरत आहे, तेच नव्या व्हायरसची भीती जगाला सतावतेय. रशियातील एका तलावाखालचा हजारो वर्ष जुना व्हायरस जिवंत केल्याचा दावा फ्रेंच शास्त्रज्ञांनी केला आहे. हा व्हायरस जिवंत झाला तर कोरोनासारखी परिस्थिती निर्माण होण्याची भीती आहे.

शास्त्रज्ञांच्या मते, जगात तापमान वाढ झाल्याने मानवाच्या आरोग्याला मोठा धोका निर्माण झाला आहे. तापमान वाढीमुळे हवामानातील बदलामुळे बर्फातील पर्माफ्रॉस्ट झपाट्याने वितळत आहेत. यामुळे अनेक जुने विषाणू पुन्हा जिवंत झाल्याचा दावा केला जातो आहे.

हा व्हायरस 45,500 वर्ष जुना असल्याचे सांगितले जात आहे. युरोपातील संशोधकांनी रशियाच्या सायबेरिया प्रदेशात आढळलेल्या प्राचीन नमुन्यांची तपासणी केली आहे. त्यात शास्त्रज्ञांनी 13 नवीन सूक्ष्मजंतू शोधून काढले आहेत. शास्त्रज्ञांनी याला 'झोम्बी व्हायरस' असे नाव दिले आहे. रशिया, जर्मनी आणि फ्रान्स देशांच्या संशोधकांच्या (scientist) गटाने सांगितले की, हे विषाणू अतिशय धोकादायक आहेत. मानवाला खूप मोठ्या संकटाला सामोरे जावे लागू शकते.

याविषयीच्या अहवालानुसार, तापमान वाढीमुळे उत्तर गोलार्धात एक चतुर्थांश गोठलेली जमीन वितळत आहे. यामुळे लाखो वर्षांपासून त्याखालील गोठलेले सेंद्रिय पदार्थ बाहेर पडतात, तसेच त्याखाली अनेक घातक सूक्ष्मजंतू असतात. संशोधक याबाबत सांगतात की, वितळणाऱ्या बर्फाच्या या सेंद्रिय पदार्थाच्या भागामध्ये लपलेले सूक्ष्मजंतू तसेच हजारो वर्ष जिवंत असलेले विषाणू यांचा धोका मानवाला सर्वाधिक असतो.

कोरोना व्हायरसने (Virus) जगात थैमान घातले होते. त्यामुळे लाखो लोकांना जीव गमवावा लागला. बऱ्याच देशांचे व्यवहार अनेक महिने लॉकाडाऊनमुळे बंद होते. जगातील अनेक देशांमध्ये बेकारी वाढली, प्रचंड मोठे आर्थिक नुकसान झाले. अशी वेळ परत जगावर आली तर काय होईल? या कल्पनेनेच लोकांमध्ये दहशतीचे वातावरण आहे.