Winter Care Tips : हिवाळ्यात कोरड्या ओठांची अशी घ्या काळजी; लक्षात ठेवा या गोष्टी

हिवाळा सुरू होताच त्वचा कोरडी पडू लागते. परंतु फाटलेल्या आणि कोरड्या ओठांची समस्या आधी जाणवते. अनेकांना इतका त्रास होतो की ओठातून रक्त येवू लागते. अशावेळी लिप बाम लावला तरी ओठ अजिबात मऊ होत नाहीत. चला तर मग जाणून घेऊया हिवाळ्यात ओठांची कशी काळजी घ्यावी. (Dry Lips Remedies at Home)

ओठांवरची मृत त्वचा काढून टाकावी

ओठांची काळजी घेण्यासाठी नियमितपणे त्यावरील मृत त्वचा काढून टाकणे आवश्यक असते. यासाठी दोन चमचे बेकिंग सोडा एक चमचा पाण्यात मिक्स करावे. हे मिश्रण ओठांवर लवावे आणि बोटांचा वापर करून हळूवार चोळावे. नंतर ओठ पाण्याने स्वच्छ धुवावे आणि टिश्यूने पुसावे. त्यानंतर ओठांवर ऑलिव्ह ऑईल लावावे. असे केल्याने ओठांची मृत त्वचा निघून जाण्यास मदत होते.

या गोष्टी लक्षात ठेवाव्या

• अनेकांना ओठांना पुन्हा पुन्हा स्पर्श करण्याची सवय असते. असे केल्याने फाटलेल्या ओठांची समस्या वाढू शकते. त्यामुळे असे करू नका. याशिवाय ओठांवर वारंवार हात लावल्याने खाज सुटू शकते.

• अनेकजण ओठांवर जीभ फिरवतात, असे केल्याने ओठ अधिकच फुटू शकतात. जर तुम्हाला अशी सवय असेल तर ती करणे बंद करा.

• हिवाळ्यात अनेक लोक पाणी पिणे कमी करतात. हे देखील ओठ फाटणे आणि कोरडे होण्याचे कारण असू शकते. ओठांच्या त्वचेवर पाण्याची आणि आर्द्रतेची कमतरता असते. त्यामुळे हिवाळ्यात पुरेसे पाणी प्यावे.