Lungs Cancer: वारंवार खोकला अन् श्वास घेण्यास त्रास होत असेल सावधान! असू शकते फुफ्फुसाच्या कर्करोगाचे लक्षण? जाणून घ्या काय सांगतायेत तज्ञ

Lungs Cancer Symptoms: खोकला येणे ही एक सामान्य गोष्ट आहे, जी शरीराची स्वतःला स्वच्छ करण्याची एक नैसर्गिक प्रक्रिया आहे. परंतु जर खोकला वारंवार किंवा बराच काळ राहिला तर ते एखाद्या गंभीर आजाराचे लक्षण ठरु शकते. बरेच लोक हवामान, सर्दी किंवा घसा खवखवणे असे समजून त्याकडे दुर्लक्ष करतात, परंतु वारंवार खोकला येणे हे केवळ किरकोळ कारणांमुळेच नाहीतर फुफ्फुस, हृदय, ऍलर्जी किंवा पोटाच्या समस्यांचे लक्षण देखील असू शकते.

दरम्यान, फुफ्फुसाच्या आरोग्याशी संबंधित निष्काळजीपणा भविष्यात गंभीर आजारांना कारणीभूत ठरु शकतो. बऱ्याच वेळा आपण दीर्घकाळ चालणारा खोकला, श्वास घेण्यास त्रास किंवा छातीत दुखणे याकडे दुर्लक्ष करतो, त्यास हंगामी समस्या किंवा ऍलर्जी मानतो, परंतु ही लक्षणे फुफ्फुसांच्या गंभीर आजाराची अगदी फुफ्फुसाच्या कर्करोगाची (Cancer) सुरुवातीची लक्षणे असू शकतात. डॉक्टरांचे म्हणणे आहे की, फुफ्फुसाच्या आजाराची लक्षणे हळूहळू दिसून येतात. ती ओळखणे अनेकदा कठीण असते. म्हणूनच, ही लक्षणे वेळीच ओळखणे गरजेचे ठरते.

वारंवार खोकला येणे धोकादायक कधी असू शकते?

आरएमएल हॉस्पिटलमधील मेडिसिन विभागाचे डॉ. सुभाष गिरी सांगतात, जर खोकला 23 आठवड्यांपेक्षा जास्त काळ राहिला आणि औषधे घेऊनही आराम मिळत नसेल तर तो फक्त सर्दी किंवा इतर आजार राहत नाही. विशेषतः जर खोकल्यासोबत कफमध्ये रक्त येत असेल किंवा आवाज बदलत असेल तर हे फुफ्फुसाच्या कर्करोगाचे लक्षण असू शकते.

जर तुम्हाला पायऱ्या चढताना किंवा थोडे चालल्यानंतर श्वास घेण्यास त्रास होऊ लागला तर ते कमजोर फुफ्फुसाचे लक्षण आहे. हे क्रॉनिक ऑब्स्ट्रक्टिव्ह पल्मोनरी डिसीज (सीओपीडी), दमा किंवा फुफ्फुसातील ट्यूमरमुळे होऊ शकते. ही लक्षणे फुफ्फुसाच्या कर्करोगाच्या सुरुवातीच्या टप्प्यात देखील दिसून येतात.

छातीत दुखणे आणि जडपणा

फुफ्फुसाच्या आजारात छातीत हलक्या वेदना, जळजळ किंवा दाब जाणवू शकतो. जर ही वेदना कायम राहिली आणि विशेषतः खोकताना किंवा श्वास घेताना वाढत गेली, तर ती हलक्यात घेऊ नका. हे फुफ्फुसाच्या संसर्गाचे किंवा कर्करोगाचे लक्षण असू शकते.

वारंवार येणारा ताप आणि थकवा

जर वारंवार सौम्य ताप येत असेल, भूक न लागणे आणि शरीरात उर्जेचा अभाव असेल, तर हे फुफ्फुसातील अंतर्गत संसर्गाचे लक्षण देखील असू शकते. फुफ्फुसाच्या कर्करोगाच्या रुग्णांमध्ये ही लक्षणे हळूहळू वाढतात.

कोणाला जास्त धोका असतो?

जे लोक बराच काळ धूम्रपान करतात

जे लोक प्रदूषित वातावरणात राहतात किंवा धुराच्या संपर्कात येतात (जसे की कारखान्यातील कामगार)

ज्या लोकांमध्ये फुफ्फुसाच्या आजाराचा कौटुंबिक इतिहास आहे.

40 वर्षांपेक्षा जास्त वयाचे आणि वारंवार श्वसनाच्या समस्या असलेले लोक

डॉक्टरांशी संपर्क साधा

जर वर उल्लेख केलेली लक्षणे कायम राहिली तर ताबडतोब डॉक्टरांशी (Doctors) संपर्क साधा. सीटी-स्कॅन, छातीचा एक्स-रे आणि थुंकीची तपासणी करुन फुफ्फुसाच्या आजाराचे निदान करता येते. जर फुफ्फुसाचा कर्करोग सुरुवातीच्या टप्प्यात आढळला तर उपचारांची चांगली शक्यता असते.