Homemade Cake: घरी केक बनवताना 'ही' काळजी नक्की घ्या

Homemade Cake: आपण अनेकदा घरात बेकरीतले पदार्थ बनवण्याचा प्रयत्न करत असतो. केक हा बहुतेकजणांना आवडणार आणि खास क्षणी खाण्यात येणारा पदार्थ आहे. असा हा केक आपण घरच्या घरी बनवण्याचा प्रयत्न करत असतो. मात्र अनेकदा किंचित चूकीमुळे आपला केक व्यवस्थित होत नाही. त्यामुळे घरी केक बनवताना थोडी काळजी घेणे महत्वाचे आहे. चला तर जाणून घेऊयात घरी केक बनवताना नक्की काय काळजी घेतली पाहिजे.

योग्य कुकर वापरा
केक बनवण्यासाठी नेहमी जड तळ आणि घट्ट झाकण असलेला कुकर वापरा. तसेच झाकणाचे रबर काढून झाकण लावावे. याशिवाय केक बनवण्यापूर्वी कुकर ५ मिनिटे व्यवस्थित गरम करा.

स्टँड वापरा
केकचे पिठ असलेले भांडे थेट कुकरमध्ये कधीही ठेवू नका. यामुळे केक खराब होऊ शकतो आणि तो जळू शकतो. म्हणून, नेहमी कुकरमध्ये प्रथम स्टीलचे स्टँड ठेवा आणि नंतर त्यावर पिठ असलेले भांडे ठेवा. असे केल्याने केक चांगला बेक होतो.

केकच्या पिठात व्हिनेगर मिसळा
जर तुम्हाला बेकरीप्रमाणे मऊ आणि स्पॉन्जी केक घरी बनवायचा असेल, तर पिठात अर्ध्या चमच्यापेक्षा थोडे कमी व्हिनेगर घाला. त्यामुळे तुमचा केक बेकरीप्रमाणे होऊ शकतो.

केक चांगला बेक होण्यासाठी योग्य तापमान
जर तुम्ही कुकरमध्ये केक बनवत असाल, तर गॅस पूर्ण वेळ मध्यम ठेवा. ओव्हनपेक्षा गॅसवर केक बनवायला जास्त वेळ लागतो हे लक्षात ठेवा, त्यामुळे अजिबात घाई करू नका. टूथपिकने एक किंवा दोनदा तुम्ही केक बेक झाला आहे की नाही याचा अंदाज लावू शकता. पण जास्त वेळा कुकर उघडणे टाळा.

या छोट्या छोट्या गोष्टींची काळजी घेतली तर तुम्हाला तुमचा केक उत्तम बनवल्याचा आनंद घेता येईल. त्यानंतर तुम्ही या केकवर क्रीमदेखील लावू शकता आणि घरी बनवलेल्या केकचा आनंद घेऊ शकता.