Dhanteras 2022 Date and Timing : यंदा धनत्रयोदशी कधी आहे? जाणून घ्या तिथी, शुभ मुहूर्त आणि विधी

हिंदू धर्मात दिवाळीला आणि धनत्रयोदशीला विशेष महत्त्व आहे. धनत्रयोदशीच्या दिवशी धन्वंतरी, देवी लक्ष्मी आणि कुबेर यांची पूजा केली जाते. या दिवशी नवीन वस्तू खरेदी करणे खूप शुभ मानले जाते. विशेषत: धनत्रयोदशीच्या दिवशी सोने किंवा चांदी विकत घेतल्यास घरामध्ये समृद्धी येते. धनत्रयोदशीच्या दिवशी अनेकजण नवीन वाहन किंवा जमीन खरेदी करतात. जाणून घेऊया या वर्षी धनत्रयोदशी कधी आहे आणि खरेदीसाठी शुभ मुहूर्त कोणते आहेत.

(Dhanteras 2022 Date and Timing)

धनत्रयोदशी 2022 कधी आहे?

हिंदू कॅलेंडरनुसार, धनत्रयोदशीचा सण कार्तिक महिन्याच्या कृष्ण पक्षाच्या त्रयोदशीला येतो. यावर्षी धनत्रयोदशी 22 ऑक्टोबर रोजी संध्याकाळी 6.02 वाजता सुरू होईल आणि 23 ऑक्टोबर रोजी संध्याकाळी 5:44 वाजता समाप्त होईल. उदयतिथीनुसार 23 ऑक्टोबर रोजी धनत्रयोदशीचा सण साजरा केला जाणार आहे.

खरेदीसाठी शुभ मुहूर्त

धनत्रयोदशीच्या दिवशी नवीन वस्तू खरेदी करणे शुभ मानले जाते आणि शुभ मुहूर्ताची काळजी घेतली तर ती अधिक फलदायी होते. जर तुम्ही धनत्रयोदशीच्या दिवशी कोणतीही नवीन वस्तू खरेदी करत असाल तर 23 ऑक्टोबरला सूर्योदयापासून संध्याकाळी 6.03 वाजेपर्यंत हा शुभ मुहूर्त आहे, यावेळेत तुम्ही खरेदी करू शकता.

धनत्रयोदशीची पूजा पद्धत

धनत्रयोदशीच्या दिवशी धन्वंतरी, देवी लक्ष्मी आणि कुबेर यांची पूजा केली जाते. ही पूजा संध्याकाळी केली जाते आणि यावेळी मंदिरात सर्व देवी-देवतांच्या मूर्ती स्थापित करून त्यांना अभिषेक केला जातो. त्यानंतर तुपाचा दिवा लावून फुले व फळे अर्पण करावीत. यानंतर कुबेर आणि देवी लक्ष्मीला पांढरी मिठाई अर्पण करावी. धन्वंतरीला पिवळ्या रंगाची मिठाई अर्पण करावी, हे लक्षात ठेवणे गरजेचे आहे.