Mockdrill At Miramar : मिरामार समुद्रकिनारी अचानक आले दहशतवादी, अन्...

देशाच्या प्रजासत्ताक दिनाच्या पार्श्‍वभूमीवर अतिरेक्यांपासून सावधानता बाळगण्यासाठी गोवा पोलिसांनी मिरामार समुद्रकिनारी ‘मॉकड्रिल’ केले.

घटनेच्या ठिकाणी सर्व यंत्रणा वेळेत पोहचून तेथे नियंत्रण मिळवण्याची प्रात्यक्षिके करण्यात आली. मिरामार येथे सोमवारी संध्याकाळी ५ च्या सुमारास हे मॉकड्रिल करण्यात आले.

पर्यटकांच्या उपस्थितीत ही कारवाई करण्यासाठी आवश्‍यक असलेली तत्परता याबाबत ही तालीम होती.

या ‘मॉकड्रिल’मध्ये पोलिसांसह, अग्निशमन दल, अतिरेकीविरोधी पथक, रुग्णवाहिका, गोव्यातील फोरेन्सिक सायंटिफिक प्रयोगशाळा, श्‍वान पथक कर्मचाऱ्यांचा समावेश होता. समुद्रकिनाऱ्यावर पोलिसांनीच बोगस अतिरेकी तयार करून त्यांच्याविरुद्ध कारवाईची तालीम करण्यात आली.

"गोवा पोलिस कोणत्याही प्रकारच्या घटना हाताळण्यात तत्पर आहेत. अतिरेक्यांना रोखण्यास गोव्याचे अतिरेकीविरोधी पथक सक्षम आहेत. या कमांडोजकडे अत्याधुनिक उपकरणे आहेत. येत्या पुढील दिवसात कळंगुट, हणजूण व पेडणे या पोलिस स्थानकाच्या क्षेत्रात अशा प्रकारचे मॉकड्रिल करण्यात येणार" असल्याचे उत्तर गोवा पोलिस अधीक्षक निधीन वाल्सन यांनी सांगितले.