Tridashanka Yoga 2026: 26 जानेवारीला आकाशात मोठा चमत्कार! बुध-अरुणचा 'त्रिदशांक योग' पालटणार 'या' 4 राशींचं नशीब; सोमवार ठरणार भाग्याचा

Tridashanka Yoga 2026: वैदिक ज्योतिषशास्त्रात नऊ ग्रहांचे सातत्याने होणारे राशी परिवर्तन मानवी जीवनावर परिणाम करत असते. या ग्रहांच्या भ्रमणामुळे अनेकदा शुभ आणि अशुभ योग निर्माण होतात, ज्याचा प्रभाव थेट आपल्या नशिबावर पडतो. आगामी सोमवार, 26 जानेवारी 2026 रोजी असाच एक दुर्मिळ आणि अत्यंत सकारात्मक योग जुळून येत आहे.

दुपारी 12:22 वाजता बुध आणि अरुण (युरेनस) ग्रह एकमेकांपासून 108 अंशांच्या कोणीय अंतरावर स्थित होणार आहेत. ज्योतिषशास्त्रात या स्थितीला 'त्रिदशांक योग' असे संबोधले जाते, ज्याला इंग्रजीत 'ट्रिडेसाइल ऐस्पेक्ट' (Tridecile Aspect) म्हटले जाते. हा योग सर्वच राशींसाठी संधींची दरवाजे उघडणारा असला, तरी चार विशेष राशींसाठी हा काळ कुबेराचा खजिना उघडण्यासारखा ठरणार असल्याचे भाकीत ज्योतिषाचार्य हर्षवर्द्धन शांडिल्य यांनी वर्तवले आहे.

या भाग्यशाली राशींमध्ये पहिली रास 'मेष' आहे. मेष राशीच्या जातकांसाठी हा त्रिदशांक योग उत्पन्नाचे नवे स्त्रोत निर्माण करणारा ठरेल. या काळात जुन्या गुंतवणुकीतून किंवा बचतीतून अनपेक्षित आणि मोठा नफा मिळण्याची दाट शक्यता आहे. व्यावसायिक क्षेत्रात काम करणाऱ्यांना नवीन प्रकल्पांच्या संधी मिळतील, ज्यामुळे तुमची आर्थिक बाजू अधिक मजबूत होईल. धनलाभाचे प्रमाण इतके जास्त असेल की, ते पैसे योग्य ठिकाणी गुंतवण्यासाठी तुम्हाला तज्ञांचा सल्ला घ्यावा लागेल.

दुसरी रास 'सिंह' असून या राशीच्या व्यक्तींसाठी करिअर आणि आर्थिक आघाडीवर हा काळ सुवर्णकाळासारखा असेल. नोकरीत बढती किंवा नव्या संधी चालून येतील आणि व्यवसायात नफ्याचा आलेख उंचावेल. या काळात केवळ पैसाच नाही, तर मानसिक शांती आणि कौटुंबिक सौख्यही लाभणार आहे.

तिसरी रास 'धनु' आहे, ज्यांच्यासाठी हा काळ विशेषतः आर्थिक भरभराटीचा मानला जात आहे. अनेक दिवसांपासून रखडलेली कामे मार्गी लागतील आणि शिक्षणाशी संबंधित क्षेत्रात असणाऱ्यांना मोठे यश संपादन करता येईल. कोणत्याही मोठ्या गुंतवणुकीसाठी किंवा महत्त्वाचे व्यावसायिक निर्णय घेण्यासाठी हा सर्वोत्तम काळ आहे.

चौथी भाग्यशाली रास म्हणजे 'कन्या'. या राशीच्या लोकांसाठी बुध-अरुण योग अमाप संपत्ती घेऊन येत आहे. तुमच्या कष्टाचे फळ मिळण्याची हीच वेळ असून, नवीन भागीदारी किंवा प्रकल्प तुम्हाला प्रगतीच्या शिखरावर नेऊन ठेवतील. संपत्तीत इतकी वाढ होईल की, ती सांभाळताना तुम्हाला स्वतःलाच आश्चर्याचा धक्का बसेल. एकूणच, 26 जानेवारीपासून सुरु होणारा हा त्रिदशांक योग या चार राशींना श्रीमंतीच्या नव्या उंचीवर नेणारा ठरेल.