Vaidhriti Yog 2026: सूर्य-चंद्राचा शुभ वैधृति योग! 21 फेब्रुवारीपासून 3 राशींच्या आयुष्यात येणार 'सुवर्णकाळ'; व्यवसायातील वाढीसह मिळणार मनशांती

Vaidhriti Yog 2026: ज्योतिष शास्त्रामध्ये ग्रहांच्या स्थितीला आणि त्यांच्या परस्पर संबंधांना अनन्यसाधारण महत्त्व दिले जाते. ग्रहांचा राजा मानला जाणारा सूर्य आणि मनाचा कारक असलेला चंद्र जेव्हा एका विशिष्ट कोनात किंवा युतीत येतात, तेव्हा त्याचे खोलवर परिणाम मानवी जीवनावर आणि बाराही राशींवर दिसून येतात. द्रिक पंचांगानुसार, 21 फेब्रुवारी 2026 रोजी शनिवारच्या मुहूर्तावर सकाळी 8 वाजण्याच्या सुमारास सूर्य आणि चंद्राच्या शुभ संयोगातून 'वैधृति योग' निर्माण होणार आहे.

ज्योतिषशास्त्रात सूर्याला मान-सन्मान, नेतृत्व क्षमता, ऊर्जा आणि वडिलांशी असलेल्या संबंधांचे प्रतीक मानले जाते, तर चंद्राचा संबंध आईशी असलेले नाते, मानसिक स्थिती, सुख आणि वाणीशी जोडला जातो. या दोन प्रभावशाली ग्रहांच्या संयोगाने तयार होणारा हा वैधृति योग फेब्रुवारी महिन्यात काही ठराविक राशींसाठी भाग्योदयाचा ठरणार असून त्यांच्या प्रगतीचे बंद दरवाजे उघडणार आहे.

मेष राशीच्या जातकांसाठी वैधृति योगाचा हा काळ अत्यंत लाभदायी ठरेल. विशेषतः मेष राशीच्या विवाहित लोकांच्या वागण्यातील सकारात्मक बदलांमुळे घरातील वातावरण प्रसन्न राहील आणि कुटुंबातील सदस्य त्यांच्यावर कौतुकाचा वर्षाव करतील. इतकेच नाही तर घरातील मोठ्यांकडून त्यांना एखादी मौल्यवान भेटवस्तू मिळण्याचेही योग आहेत.

तसेच, मेष राशीच्या तरुण पिढीसाठी हा काळ स्वप्नपूर्तीचा असेल, त्यांची एखादी जुनी इच्छा या काळात पूर्ण होऊ शकते. करिअरच्या (Career) दृष्टीने हा काळ अत्यंत महत्त्वाचा असून, जर तुम्हाला प्रगतीची किंवा नोकरीची एखादी छोटी जरी संधी मिळाली तर ती हातातून जाऊ देऊ नका, कारण या संधीचे रुपांतर मोठ्या यशात होऊ शकते. याशिवाय, आरोग्याच्या आघाडीवरही तुम्हाला दिलासा मिळणार असून जुन्या आजारांपासून या काळात सुटका मिळेल.

कर्क राशीच्या लोकांसाठी सूर्य आणि चंद्राचा हा वैधृति योग सुवर्णाक्षरांनी लिहिण्यासारखा काळ घेऊन येणार आहे. विवाहित जातकांना आपल्या जोडीदाराकडून एखादा नवीन दागिना किंवा मौल्यवान वस्तू भेट म्हणून मिळण्याची दाट शक्यता आहे. या राशीच्या तरुणांमध्ये सर्जनशील कामांची आवड वाढेल, ज्याचा फायदा त्यांना भविष्यात करिअर घडवताना नक्कीच होईल.

कौटुंबिक आघाडीवरही हा काळ गोडवा घेऊन येईल, विशेषतः जर तुमचे तुमच्या भावंडांशी काही कारणास्तव मतभेद झाले असतील किंवा बोलणे बंद झाले असेल, तर या काळात संवाद पुन्हा सुरु होईल आणि नात्यात प्रेम आणि आदर वाढेल. करिअरमध्ये जरी कामाची सुरुवात संथ वाटली तरी तुमच्या मेहनतीमुळे तुम्हाला मोठे यश आणि आर्थिक लाभ नक्कीच प्राप्त होईल.

धनु राशीच्या जातकांसाठी फेब्रुवारी 2026 चा हा काळ अतिशय समाधानकारक असेल. गेल्या अनेक दिवसांपासून तुमच्या घरात जो काही तणाव किंवा कटकटी सुरु होत्या, त्यातून आता कायमची सुटका होईल. तुम्ही तुमच्या वैयक्तिक आयुष्यातील निर्णयांबाबत समाधानी राहाल आणि मनावरचे ओझे हलके होईल.

नोकरी करणाऱ्या लोकांसाठी हा काळ यशाचा असून प्रलंबित राहिलेली महत्त्वाची कामे या काळात यशस्वीरीत्या पूर्ण होतील. व्यावसायिकांसाठीही हा काळ विस्ताराचा असून तुम्ही आखलेल्या योजनांमधून तुम्हाला मोठा आर्थिक फायदा होईल. वयोवृद्ध व्यक्तींच्या प्रकृतीत मोठी सुधारणा दिसून येईल, ज्यामुळे त्यांना अधिक उत्साही वाटेल. तसेच, आगामी काळात तुम्हाला तुमच्या आवडीच्या ठिकाणी पर्यटनाला जाण्याची संधी देखील चालून येईल.