Vasco News: पंजाबमधील श्वानपथक ठरले कुचकामी; इंधनगळतीचे गूढ कायम

Vasco News: दाबोळी-चिखली व्हडलेभाट परिसरात झुआरी इंडियन ऑईल कंपनीच्या भूमिगत वाहिनीतून होणाऱ्या तेल गळतीला ११ दिवस उलटले, तरी अद्याप गळतीचे निश्‍चित ठिकाण शोधण्यात सरकारी यंत्रणांना यश आलेले नाही.

यासाठी पंजाबमधून श्वानपथक दाखल झाले असून आज सकाळपासून या पथकाने शोधकार्यास सुरवात केली; परंतु संध्याकाळी उशिरापर्यंत गळतीचा उलगडा झालाच नाही. मात्र, दोन दिवसांत उलगडा होईल, असे कंपनीच्या अधिकाऱ्यांनी सांगितले.

झुआरी इंडियन ऑईल टॅंकिंग प्रायव्हेट लिमिटेड कंपनीच्या भूमिगत इंधनवाहिनीतून गळती सुरू होऊन आज ११ दिवस झाले आहेत.

तरीही व्हडलेभाट परिसरातील विहिरीत व नाल्यांत पेट्रोल व डिझेलमिश्रित पाणी आढळल्याचे पंच नीलम नाईक यांनी सांगितले.

गळती शोधण्यासाठी विविध मशीन्सचा वापर केला जात असल्याची माहिती गोवा राज्य प्रदूषण नियंत्रण मंडळाचे अध्यक्ष महेश पाटील यांनी दिली.

झुआरी इंडियन ऑईल टँकिंग प्रायव्हेट लिमिटेडने माटवे-दाबोळी येथील इंधन वाहिनीतून गळती होणारे ठिकाण शोधण्यासाठी पंजाबमधून श्वानपथक मागवल्यानंतर ते बुधवारी सायंकाळी गोव्यात दाखल झाले.

आरोग्य तपासणी करा!

झुआरी इंडियन ऑईल कंपनीने येथील लोकांची रोज आरोग्य तपासणी करण्यासाठी डॉक्टर पाठवावेत. कारण इंधनाच्या वासामुळे स्वास्थ्य बिघडण्याची शक्यता नाकारता येत नाही.

त्यामुळे येथील लोकांची रोज आरोग्य तपासणी करण्यासाठी सुविधा उपलब्ध करावी, अशी मागणी येथील पंच नीलम नाईक यांनी केली आहे.

येथील नाले, विहिरी जलस्रोत नष्ट झाले असल्याने याला कारणीभूत असलेल्या दोषींवर कारवाई करावी, अशी मागणीही नाईक यांनी केली आहे.