Yuri Alemao: पर्यटनमंत्र्यांनी आदर्श उदाहरण समोर ठेवले; युरींकडून कौतुक

पणजी: गोवा पर्यटन प्रोत्साहन, व्यवस्थापन आणि नियमन प्रस्तावित विधेयकाचा मसुदा लोकांच्या सूचनांसाठी खुला ठेवल्याने पर्यटनमंत्री रोहन खंवटे यांचे विरोधी पक्षनेते युरी आलेमाव यांनी कौतुक केले आहे. मंत्र्यांनी या निर्णयाने इतरांसमोर एक आदर्श उदाहरण समोर ठेवल्याचेही त्यांनी नमूद केले

प्रश्नोत्तर तासाला वरील विधेयकासंबंधीचा तारांकित प्रश्न युरी आलेमांव यांनी उपस्थित केला होता. या विधेयकाचा मसुदा तयार होताच आमदारांचीही एक बैठक मंत्र्यांनी बोलावली आणि त्यांच्या सूचना जाणून घेतल्या. अशाचप्रकारे सर्वाना विश्वासात घेऊन या गोष्टी पुढे जाणे अपेक्षित असल्याचे युरी यांनी सांगितले.

हा मसुदा तयार करण्यासाठी एका संस्थेची नेमणूक केली होती. या संस्थेने १ कोटी ३७ लाख रुपये बिल सादर केल्याचा दावा आलेमाव यांनी केला. यावर पर्यटन मंत्र्यांनी आक्षेप घेत ही अर्धवट माहिती असल्याचे सांगितले. यावर स्पष्टीकरण देताना मात्र म्हणाले की, पहिल्या टप्प्यात या संस्थेने केवळ ३५ लाख व अन्य खर्च मिळून एकूण ४१ लाख रुपयांचे बिल सादर केले. दुसऱ्या टप्प्यातील बिल अद्याप संस्थेने सादर केले नाही.