लग्नासाठी काढलेले 15 लाखांचे कर्ज कॅसिनोत उधळले, कुडचडेतील नवरदेवाचा विवाह पुढे ढकलला

गोव्यात ऑनलाईन गेमिंग आणि कॅसिनोच्या आहारी गेलेल्या युवकांची वाढती समस्या, यावर एकच दिवसांपूर्वी विधानसभेच्या पावसाळी अधिवेशनात चर्चा झाली. सरकारने याबाबत कडक नियमावली करून तरूणांना या व्यसनापासून परावृत्त करण्याची गरज असल्याचे मत यावेळी विरोधकांनी मांडले.

असे असताना कुडचडे येथून एक धक्कादायक घटना समोर आली आहे. जुगाराला बळी पडलेल्या एका युवकाने लग्नासाठी काढलेले 15 लाखांचे कर्ज पैसे कॅसिनोवर उधळल्याचा प्रकार समोर आला आहे. यामुळे युवकाचे लग्न पुढे ढकलण्याची वेळ आली आहे.

कुडचडेत ऑनलाईन कॅसिनोला बळी पडलेल्या युवकांचे वाढते प्रमाण चिंतेचा विषय असल्याचे स्थानिक सांगतात. कॅसिनोत झालेली उधारी चुकती करण्यासाठी युवक टोकाची पावले उचलत आहेत. आता लग्नासाठी घेतलेले तब्बल 15 लाखांचे कर्ज कॅसिनोवर उधळल्याने परिसरात खळबळ निर्माण झाली आहे.

यापूर्वी जुगाराला बळी पडलेल्या युवकांनी दुचाकी विकल्याच्या घटना देखील उघडकीस आल्या आहेत. त्यात या नव्या प्रकरणामुळे राज्यातील युवक ऑनलाईन जुगाराच्या जाळ्यात अडकत चालल्याचे दिसत आहे. याबाबत स्थानिक तसेच, लोकप्रतिनिधी देखील चिंता व्यक्त करत आहेत.

विधानसभेत झाली वादळी चर्चा

सध्या सुरू असलेल्या पावसाळी अधिवेशनात ऑनलाईन जुगाराबाबत वादळी चर्चा झाली. विरोधी पक्षनेते युरी आलेमाव यांनी, राज्यात ऑनलाईन जुगार खेळला जात असून, त्यात अनेक युवक गुंतले आहेत. लाखो रुपये गमावून बसल्यानंतर काहीजण आत्महत्या करत आहेत. अशी चिंता व्यक्त केली.

यावर उत्तर देताना गृहमंत्री या नात्याने सावंत यांनी राज्यात वैध पद्धतीने सुरू असणारे कॅसिनो  आहेत. पण, त्याशिवाय ऑनलाईन गेम खेळले जात आहेत, त्याबाबत आम्ही माहिती घेत असून गोव्यात ऑनलाईन गेमिंग चालू देणार नाही, अशी भूमिका मांडली.