मडगाव परिसरात अज्ञात वाहनाच्या धडकेत युवकाचा मृत्यू

फातोर्डा : एका अज्ञात चारचाकी वाहनाने धडक दिल्याने जखमी झालेल्या युवकाचा गोमेकॉत उपचारादरम्यान मृत्‍यू झाला. तो अंदाजे 20 ते 25 वर्षांचा असून मडगाव पोलिसांनी अनैसर्गिक मृत्यू म्हणून नोंद केली आहे. मयताची ओळख पटलेली नाही. त्यामुळे परिसरात खळबळ उडाली आहे. हा अपघात मडगाव येथील एका हॉस्पिटलजवळ घडला.

हा तरुण रस्त्याच्या मधोमध बसला असता त्याला चारचाकी वाहनाने धडक देऊन पळ काढला. नंतर त्याला एका दुचाकीचीही धडक बसली होती. याबाबत मडगाव पोलिस पुढील तपास करत आहेत.

दरम्यान, दक्षिण गोव्यातील नावेली येथे एक व्यक्ती तळ्यात बुडाल्याची घटना घडली आहे. दारुच्या नशेत तळ्यात उतरलेल्या इसमाचा बुडून मृत्यू झाला आहे. तियागो मारियानो पिरिस असं या 52 वर्षीय व्यक्तीचं नाव आहे.

नावेली येथे असलेल्या एका तळ्यात तो आंघोळीसाठी उतरला होता. काही वेळ झाल्यांनतर तो बाहेर आला नसल्याने त्याच्या अन्य एका नातेवाईकाने तळ्यात उतरून त्याचा शोध घेतला. यावेळी नाकातोंडात पाणी गेलेल्या अवस्थेत त्याला बाहेर काढण्यात आलं. हालचाल न दिसल्याने त्याला मडगाव येथील जिल्हा हॉस्पिटलमध्ये दाखल करण्यात आलं मात्र रुग्णालयातील डॉक्टरांनी त्याला मृत घोषित केले. हा बुडालेला व्यक्ती दारुच्या नशेत असल्याचं निष्पन्न झालं आहे.