होळीदिवशी तरुणाला बेदम मारहाण, दोन पोलीस निलंबित

फोंडा : होळीच्या दिवशी काल शुक्रवारी संध्याकाळी साडेसहाच्या सुमारास कोडार - बेतोडा येथे बाचाबाचीच्या प्रकरणातून पोलिसांनी एकाला बेदम मारहाण केल्याची घटना घडली आहे. याप्रकरणी संशयित पोलिस कॉन्स्टेबल रामा खाणेकर आणि ओंकार मानकर यांच्याविरुद्ध गुन्हा दाखल करण्यात आला आहे. दोघांनाही सेवेतून तात्काळ निलंबित करण्यात आले आहे.

कोडार येथे या दोन्ही पोलिसांनी (Police) महेश मोहनलाल जयस्वाल राहणार कुर्टी - फोंडा या 26 वर्षीय तरुणाला लाठीने जबर मारहाण केली. या मारहाणीत महेश जयस्वाल जखमी झाला असून त्याला उपचारासाठी फोंडा (Ponda) आयडी इस्पितळात नेण्यात आले. ही मारहाण इतकी गंभीर होती की तरुणाच्या पाठीवर याचे व्रण दिसत आहेत.

कायदा हातात घेऊन महेश जयस्वाल याला मारहाण केल्याप्रकरणी फोंडा पोलिस स्थानकाचे उपनिरीक्षक साजित पिल्ले यांनी पोलिस निरीक्षकाकडे रीतसर तक्रार दाखल केली आहे. यानंतर रामा खाणेकर आणि ओंकार मानकर या दोघांविरुद्ध गुन्हा दाखल करण्यात आला आहे. दोघांनाही सेवेतून निलंबित करण्यात आल्याची माहिती देण्यात आली आहे. याप्रकरणी अधिक तपास पोलिसांनी सुरु केला आहे.