स्पेशल ऑलिंपिक जागतिक स्पर्धेत गोव्याचे खेळाडू चमकले, जिंकली एकूण सहा पदके

गोव्याच्या सिया सरोदे आणि तानिया उसगावकर यांनी जर्मनीतील बर्लिन येथे सुरू असलेल्या स्पेशल ऑलिंपिक जागतिक उन्हाळी क्रीडा स्पर्धेत राज्यासाठी बुधवारी अभिमानास्पद कामगिरी बजावली. स्पर्धेत भारताचे प्रतिनिधित्व करणाऱ्या गोमंतकीय खेळाडूंनी आतापर्यंत तीन सुवर्ण, एक रौप्य व दोन ब्राँझ अशी एकूण सहा पदके जिंकली आहे.

भाटी-सांगे येथील सिया हिने पॉवरलिफ्टिंगमध्ये दोन सुवर्णांसह एकूण चार पदके पटकावली. तिने डेड लिफ्ट आणि स्क्वॅट प्रकारात सुवर्ण, तर कंबाईंड प्रकारात रौप्य आणि बेंच प्रेस प्रकारात ब्राँझपद मिळविले. राज्याचे समाजकल्याण खात्याचे मंत्री सुभाष फळदेसाई यांनी सियाचे कौतुक करताना ही कामगिरी गोमंतकीय आणि भारतीयांसाठी अभिमानास्पद असल्याचे नमूद केले. गोव्याची ॲथलिट गीतांजली नागवेकर हिने मंगळवारी सुवर्णपदक जिंकले होते. या स्पर्धेत गोव्याचे 13 ‘स्पेशल’ क्रीडापटू सहभागी झाले आहे

तानियाची स्वप्नपूर्ती

डिचोली येथील केशव सेवा साधना केंद्राची विद्यार्थिनी असलली १५ वर्षीय तानिया उल्हास उसगावकर सुर्ल-पाळी येथील देऊळवाडा येथे राहते. तिने रोलर स्केटिंगमधील ३० मीटर स्ट्रेट लाईन प्रकारात तिसरा क्रमांक मिळविला. ‘‘तानियाचे पदक हे आम्हा सर्वांची स्वप्नपूर्ती आहे. आमच्या मुलीने दोन पदके जिंकण्याचे आश्वासन दिले होते. त्या दिशेने तिचे एक पाऊल यशस्वी ठरले. स्पर्धेतील आणखी एका प्रकारात ती सुवर्णपदक जिंकण्याचा आम्हाला विश्वास आहे,’’ अशी प्रतिक्रिया तानियाची आई अनिता उसगावकर यांनी दिली. तानिया ३० मीटर स्लॅलॉम प्रकारात भाग घेणार आहे.

गोव्याचे पदक विजेते खेळाडू

- गीतांजली नागवेकर ः ॲथलेटिक्स - सुवर्णपदक, लेव्हल डी ८०० मीटर

- सिया सरोदे ः पॉवरलिफ्टिंग - सुवर्णपदक (२) डेड लिफ्ट व स्क्वॅट, रौप्य कंबाईंड, ब्राँझ बेंच प्रेस

- तानिया उसगावकर ः रोलर स्केटिंग - ब्राँझपदक, ३० मीटर स्ट्रेट लाईन