Goa Mission Rabies: 6 तालुके, 109 केंद्र! गोव्यात मोफत रेबीज लसीकरण मोहीम; कधी, कुठे? जाणून घ्या सर्वकाही

Goa Mission Rabies: जागतिक रेबीज दिनानिमित्त गोव्यात मोफत लसीकरण मोहीम सुरु करण्यात आली आहे. राज्यातील सहा तालुके आणि 109 केंद्रांवर ही सुविधा उपलब्ध असणार आहे.

29 सप्टेबर ते 21 ऑक्टोबर या कालावधीत लसीकरण सुरु राहणार असल्याचे जिल्हाधिकाऱ्यांच्या प्रसिद्धीपत्रकात म्हटले आहे.

जिल्हाधिकारी कार्यालयाच्या वतीने सासष्टी, फोंडा, सांगे, केपे, मुरगाव आणि तिसवाडी असे एकूण सहा तालुक्यात लसीकरण मोहीम राबवली जाणार आहे. यामध्ये नव्वद पंचायत केंद्र आणि 19 इतर केंद्र अशा एकूण 109 केंद्रांवर लसीकरण मोहीम राबवली जाणार आहे.

नागरिकांनी केंद्रावर भेट देऊन श्वानांचे लसीकरण करुन घ्यावे असे आवाहन करण्यात आले आहे.

'गोवा देशातील पहिले 'रेबीज नियंत्रित क्षेत्र' आहे. राज्यात मानवात रेबीज संक्रमण रोखण्यात आले आहे. याबद्दल मी राज्य पशुसंवर्धन विभाग आणि मिशन रेबीजचे अभिनंदन करतो. राज्याची कामगिरी टिकवून ठेवण्यासाठी आणि कुत्र्यांमधील विषाणू नष्ट करण्यासाठी आम्ही संपूर्ण वर्षभर कुत्र्यांचे लसीकरण सुरू ठेवतो आणि तालुक्यांमध्ये वर्षातून एकदा लसीकरण केले जाते.'

'गोव्यातील लोक श्वानप्रेमी आहेत. जबाबदार पाळीव प्राणी मालक व्हा, कुत्र्यांचे निर्जंतुकीकरण आणि लसीकरण करा अशी मी जनतेला विनंती करतो.' असे आवाहन मुख्यमंत्री प्रमोद सावंत यांनी पणजीतील एका कार्यक्रमात केले.