बेतोडा-बायथाखोल बोरी रस्त्याचे काम कूर्मगतीने

मॉन्सून अवघ्या काही दिवसांवर येऊन ठेपला असताना बेतोडा ते बायथाखोल-बोरी या बगल रस्त्याचे काम अतिशय कूर्मगतीने सुरू आहे. पावसाळा सुरू होण्यापूर्वी हे काम पूर्ण करावे, अशी मागणी येथील सामाजिक कार्यकर्ते विराज सप्रे यांनी केली आहे.

पावसाळा अवघ्या काही दिवसांवर येऊन ठेपला असताना, बायथाखोल- बोरी ते बेतोडा बायपास रस्त्याचे सुरू असलेले रुंदीकरणाचे काम पूर्ण होण्याची शक्यता फारच कमी आहे.

गेल्या बुधवारी झालेल्या जोरदार मॉन्सूनपूर्व पावसावेळी नव्याने टाकलेल्या डांबराचा आणि गटाराचा काही भाग वाहून गेला आहे.

बगल रस्त्याचे काम गेल्या तीन महिन्यांपासून सुरू आहे आणि ते अतिशय संथ गतीने सुरू असल्याने या रस्त्यावरून ये-जा करणाऱ्या वाहनचालकांची मोठी गैरसोय होत आहे.

गेल्या बुधवारी झालेल्या मुसळधार पावसामुळे या रस्त्याची दैन्यावस्था झाली आहे. आता येणाऱ्या पावसाळ्यात त्याची काय स्थिती होईल, असा प्रश्‍न स्थानिकांना पडला आहे.

बेतोडावासी संकटात

या संथ गतीच्या कामाचा परिणाम वाहनधारकांना आणि विशेषत: बोणबाग आणि बेतोडा येथील लोकांवर होणार आहे. या बांधकामादरम्यान कल्व्हर्ट अडवण्यात आले होते आणि रस्त्याच्या कडेला असलेल्या मोठ्या तलावांमध्ये पाणी साचले होते.

या रस्त्याचे काम घेतलेल्या कंत्राटदाराला वाहनचालकांची अजिबात काळजी नाही का, असा प्रश्‍न उपस्थित केला जात आहे.

निर्माणाधीन रस्त्यावर वारंवार अपघात

ज्या ठिकाणी रस्त्याचे काम सुरू आहे, त्या ठिकाणी कंत्राटदाराचा सुपरवायझर असणे अत्यंत गरजेचे आहे. या ठिकाणी वारंवार होणाऱ्या अपघाताला कंत्राटदार जबाबदार आहे.

काही दिवसांपूर्वी या रस्त्यावरील कचऱ्यावरून एक दुचाकी घसरून दोघेजण जखमी झाले होते. सार्वजनिक बांधकाम खात्याच्या रस्ता विभागाने याची दखल घ्यावी, अशी मागणी विराज सप्रे यांनी केली आहे.