Goa Rain: घरावर झाड कोसळून महिला जखमी, वाहनांचा चुराडा, मुरगाव बंदरातील कामकाज ठप्प; गोव्यात पावसाचे धुमशान सुरुच

पणजी: राज्यात सलग तीन दिवसांपासून मान्सूनपूर्व पावसाचे धुमशान सुरूच आहे. राज्यातील सर्वच भागात वादळी वाऱ्यासह मध्यम स्वरूपाचा पाऊस पडत आहे. गुरुवारी (२२ मे) सकाळपासून वातावरणही दमट होते. चक्रीय वारा आणि मोठ्या प्रमाणात सुरू असलेल्या पावसामुळे राज्यात पडझडीच्या घटनांत वाढ झाली आहे.

दरी कोसळणे, झाडे पडून दुचाकी आणि चारचाकीचे मोठ्या प्रमाणात नुकसान झाल्याच्या घटना गुरुवारी दिवसभरात मोठ्या प्रमाणात नोंदविण्यात आला. सावईवेरे येथे एका घरावर झाड कोसळून मोठ्या मोठे नुकसान झाले आहे. तसेच घरात असलेल्या महिलेलाही दुखापत झाली असून तिला तत्काळ इस्पितळात उपचारांसाठी दाखल केले आहे.

प्रमुख घटना

१) सावईवेरे येथे घरावर झाड कोसळून मोठी हानी, घरातील महिला जखमी झाल्याने उपचारासाठी इस्पितळात दाखल.

२) चक्रीय वारे वाहण्याची शक्यता वर्तविल्याने मुरगाव बंदरातील कामकाज ठप्प.

३) खोबरावाडा कळंगुट येथे झाड कोसळून पाच चारचाकी वाहनांचा चुराडा.

४) वेरे येथील पेट्रोलपंप शेजारील झाड संरक्षण भिंतीवर कोसळले, घटनेत दुचाकींचीही हानी.

५) इंदिरानगर चिंबल येथे तीन माड कोसळून दुचाकी आणि चारचाकीची जबर नुकसान.