नोकऱ्या देण्यासाठी बाबूंना आणखी पाच वर्षे कशाला?

मोरजी: बाबू आजगावकर यांना पेडणे मतदारसंघातील युवकांना नोकऱ्या देण्यासाठी आणखी पाच वर्षांची गरज का भासली? ते सध्या गोव्याचे उपमुख्यमंत्री आहेत. मग त्यांना जर आताच युवकांसाठी नोकऱ्या देणे शक्य नाही तर पुढच्या पाच वर्षांत ते कशा देतील? निवडणूक जवळ येताच बाबू लोकांच्या दारी जाऊन पाया पडून मते मागतात; पण निवडून आल्यानंतर या पक्षातून त्या पक्षात उड्या मारून मतदारांना विसरतात आणि स्वतःचा विकास करून घेतात, असा आरोप रिव्होल्युशनरी गोवन्सचे सदस्य सुजय म्हापसेकर यांनी केला.

पेडणे मतदारसंघात अनेक प्रकल्प आहेत. पण त्या प्रकल्पांत गोव्यातील युवकांना नोकऱ्या न देता परप्रांतीय राज्य गाजवत आहेत. बाबूंच्या मागून फिरणारे कंत्राट घेतात आणि मतदारांच्या वाट्याला काहीही येत नाही. पेडणेतील रस्त्यांची दुरवस्था दिसून येते.

रोजगार देण्यासाठी ‘आरजी’ सक्षम

‘आरजी’ची दारोदारी मोहीम पेडणे मतदारसंघात जोरात सुरू आहे. येणाऱ्या विधानसभेला पेडणे मतदारसंघात आरजीचा उमेदवार विजयी होईल, यात शंका नाही. आरजी स्थानिक युवकांना नोकऱ्या देण्यासाठी सक्षम आहे. पेडणेकरांना आता पेडण्याबाहेरील उमेदवारांची गरज नाही पेडणेतील उमेदवार जनतेला देण्यासाठी आरजी सक्षम आहे, असे सुजय म्हापसेकर म्हणाले.

पेडणेकरांना नोकऱ्या मिळत नसतील तर मोपासारख्या प्रकल्पाची पेडणेला गरज नाही. बाबूंनी एकेवेळी विमानतळाचे काम बंद पाडले होते. मात्र, दुसऱ्याच दिवशी पुन्हा काम सुरू केले. त्यानंतर आजपर्यंत बाबूंनी किती जणांना मोपा विमानतळावर रोजगार मिळवून दिला? त्यांनी फक्त नातेवाईकांना कंत्राटे दिली आणि स्वत: कमिशन मिळवले

- सुजय म्हापसेकर, आरजी