Goa Liquor Revenue: एक, दोन नव्हे महसुलात तब्बल 6 पट वाढ; मद्यविक्रीतून गोवा मालामाल...

Goa Liquor Revenue: देशातील इतर राज्यांच्या तुलने गोव्यात मद्यावरील करांमध्ये सुट असल्याने येथे मद्याच्या किंमती कमी असतात. त्यामुळे देशभरातील मद्यप्रेमी पर्यटकही गोव्यात पर्यटनासाठी येतात, तेव्हा त्यातून ते येथे स्वस्तःत उपलब्ध होणाऱ्या मद्याचेही सेवन करत असतात. त्यातून पर्यटन हंगामात गोव्याला मोठा महसूलही मिळत असतो.

ताज्या माहितीनुसार, गोव्यात गतवर्षात मद्यविक्री महसुलात तब्बल 135 कोटी रूपयांची वाढ झाल्याची माहिती आहे. ही वाढ त्या आधीच्या वर्षीच्या वाढीच्या (23 कोटी) तुलनेत 6 पट इतकी जास्त आहे.

सन 2019-20 मध्ये मद्यविक्रीतून गोव्याला 491.84 कोटींचा महसूल मिळाला होता. सन 2020-21 मध्ये त्यामध्ये 23 कोटींची वाढ होऊन हा महसूल 514.91 कोटींवर गेला. तर गतवर्षी 2021-22 मध्ये या महसुलात 135 कोटी रूपयांची वाढ होऊन एकूण महसूल 649.91 कोटी रूपयांवर गेल्याचे समजते.

2019-20 मध्ये कोविड काळामुळे या काळात राज्यातील पर्यटकांच्या संख्येवर मोठा परिणाम झाला होता. त्यामुळे या काळात मद्यविक्रीतील महसूल घटला होता. एकुणच या महसुलवाढीमुळे राज्याच्या तिजोरीत भरघोस भर पडली आहे.