कुठ्ठाळीचे पाणी जातेय कुठे?

वास्को: कुठ्ठाळी मतदारसंघ सध्या पाणीटंचाईने ग्रासला आहे. या ठिकाणी पाणी टंचाई वारंवार जाणवत आहे. कुठ्ठाळीच्या वाट्याचे पाणी वेर्णा व सांकवाळ औद्योगिक वसाहतींकडे वळविल्याचा संशय असल्याने सर्व व्हॉल्वची तपासणी करण्यात येणार असल्याचा इशारा देत कुठ्ठाळीतील पाणी समस्या दूर करण्यासाठी माझे सर्वतोपरी प्रयत्न सुरू आहेत, अशी माहिती कुठ्ठाळीचे नवनिर्वाचित आमदार ॲन्थोनी वाझ यांनी दिली.

आमदार वाझ म्हणाले, कुठ्ठाळी मतदारसंघातील काही भागात पाणीपुरवठा न झाल्याने लोकांच्या तक्रारी माझ्याकडे वारंवार येत असल्याने पाणीपुरवठा विभागाच्या अधिकाऱ्यांशी शुक्रवारी बैठक घेण्यात आली आहे. येत्या काही दिवसांत सर्व व्हॉल्व तपासून कुठ्ठाळीचे पाणी नेमके जाते कुठे, याचा तपास केला जाईल, असे ते म्हणाले.

आमच्या वाट्याचे पाणी आम्हालाच हवे

कुठ्ठाळीतील पाणी टंचाई लवकर दूर होण्याची गरज असल्याने आम्ही काही सूचना पाणी विभागाच्या अभियंत्यांना केल्या आहेत. वास्को, दाबोळी, आगशी, कुठ्ठाळी व इतर भागांना किती पाणीपुरवठा होतो, यासंबंधी आढावा घेणार आहे. कुठ्ठाळीमार्गे आगशीला जलवाहिनी घालण्यात आली आहेत. कुठ्ठाळीला पाणीपुरवठा केल्यावर व्हॉल्व बंद करून आगशीला पाणीपुरवठा करण्यासाठी त्या बाजूचा व्हॉल्व सुरू करण्यात येतो. परंतु आम्हाला पाणी कमी मिळते. आमच्या वाट्याचे पाणी आम्हाला मिळालेच पाहिजे. आम्ही इतरांना पाणी देऊ नका, असे म्हणत नाही. परंतु आम्हाला योग्य प्रमाणात पाणीपुरवठा करा, असे आमदार वाझ यावेळी म्हणाले.