Goa Weather Update : कधी होणार राज्यात मान्सून दाखल, हवामान खात्याने दिली माहिती

यंदा नैऋत्य मान्सून 4 जून रोजी केरळमध्ये दाखल होण्याची शक्यता आहे. त्यानंतर त्याचा प्रवास गोव्याच्या दिशेने सुरू होणार आहे. राज्यात 8 जूनपर्यंत मान्सून दाखल होऊ शकतो. मॉन्सूनचा वेग काही प्रमाणात मंदावला आहे.

सक्रीय झालेला मान्सून मालदीव समुद्रात दक्षिण अरबी समुद्रात दाखल झाल्याचे हवामान खात्याने जाहीर केले आहे.

येत्या काही दिवसात अरबी समुद्रात चक्रीय वादळाची शक्यता वर्तविण्यात आली आहे. त्यासोबतच बिहार, बंगाल, आणि सक्कीम राज्यात पुढील पाच दिवस उष्णतेच्या लाट असणार आहे. राज्यात येत्या दोन दिवसात मॉन्सूनपूर्व पावसाची शक्यता वर्तविण्यात आली आहे. तसेच 30 ते 40 किमी प्रतितास वेगाने वारे वाहण्याची शक्यता असून विजांसहित काही भागात तुरळक पाऊस बरसण्याची शक्यता गोवा वेधशाळेने वर्तविली आहे.

दरम्यान बुधवारी मध्यरात्री सुरू झालेल्या पावसाने गुरुवारी सकाळीपर्यंत कुडचडे शहराला झोडपून काढले होते. कुडचडे बाजारातील बरेच रस्ते पाण्याखाली गेले होते तर काही ठिकाणी दुकानात पाणी घुसल्याने कुडचडे बाजारात लोकांची तारांबळ उडाली होती.