गोवा सरकारच्या निर्णयाविरोधात न्यायालयात दाद मागू - खनिज निर्यातदार संघटना

मडगाव : गोव्यातील 88 खनिज लिज धारकांना त्यांच्या ताब्यात असलेल्या जमिनी परत सरकारच्या ताब्यात द्या अशा आशयाच्या नोटिसा पाठविल्या आहेत त्यावर  खनिज निर्यातदार संघटनेने आम्ही आमची बाजू सरकारकडे मांडू आणि गरज पडल्यास या निर्णया विरोधात न्यायालयात दाद मागू अशी अधिकृत प्रतिक्रिया व्यक्त केली आहे. (We will be appeal to the court against the decision of Goa government )

या संघटनेचे सचिव ग्लेन कालावंपारा यांनी प्रसिद्धीस दिलेल्या पत्रकात अजून या संबंधी आदेश जारी झालेला नाही. मात्र आमच्या काही सदस्यांना याबद्दलच्या नोटिसा मिळाल्या आहेत अशी माहिती मिळाल्याचे सांगितले.

या संबंधीची प्रकरणे सध्या उच्च न्यायालयात प्रलंबित आहेत असे सांगून आम्ही आमची बाजू सरकारपुढे प्रभावीपणे मांडू आणि गरज पडल्यास न्यायालयातही दाद मागू असे त्यांनी म्हटले आहे. या संदर्भात लिजधारक कंपन्याकडे प्रतिक्रियेसाठी संपर्क साधण्याचा प्रयत्न केला असता त्यांनी कोणतीही प्रतिक्रिया देण्यास नकार दिला.