Opa Pipeline Leakage: गांजे-उसगावात जलवाहिनी फुटली

Opa Pipeline Leakage: गांजे-उसगाव येथे बुधवारी रात्री ओपा जलप्रकल्पाला पाणीपुरवठा करणारी वाहिनी फुटल्याने बाका प्रसंग उद्‍भवला. या वाहिनीचे पाणी बंद केल्यानंतर दुरुस्तीकाम सुरू करण्यात आले.

गांजेतील हे पाणी ओपा प्रकल्पासाठी खांडेपार नदीत सोडले जाते. त्यामुळे पाणी वितरणावर परिणाम झाला नाही. गुरुवारी रात्री उशिरापर्यंत दुरुस्तीचे काम सुरू होते. ओपाला पाणीपुरवठा बंद झाल्यानंतर 600 एमएम व्यासाच्या जुन्या वाहिनीतून पाणीपुरवठा सुरू करण्यात आला.

तीनवेळा तोच प्रकार

गांजे प्रकल्पातून ओपा जलप्रकल्पाला पाणीपुरवठा करणारी ही वाहिनी आठवड्याभरात तीनवेळा फुटली. ही वाहिनी फुटल्यामुळे ओपा जलप्रकल्पावर थोडा ताण आला; पण दूधसागर नदीवरील तीन बंधारे ओपा प्रकल्पासाठी खुले केल्याने ओपाची पाणी पातळी वाढली.

गांजेतील पाणी बंद झाल्यामुळे ओपातील पाण्याची पातळी खालावली होती, ती बंधाऱ्यांमुळे आता सुस्थितीत आहे.

..तर मर्यादित पाणीपुरवठा!

यंदा मान्सूनपूर्व पाऊस झाला नसल्याने पाणी पुरवठ्यावर परिणाम झाला आहे. ओपा प्रकल्पाची पातळी २.७० मीटरवर आली असून ती आणखी घसरल्यास फोंडा व तिसवाडी तालुक्याला मर्यादित पाणीपुरवठा करावा लागेल.

सध्या तरी व्यवस्थित पुरवठा सुरू आहे. पण पावसाळा सुरू होईपर्यंत ही स्थिती राहील, अशी शक्यता वाटत नसल्याने खात्याच्या अभियंत्यांनी स्पष्ट केले.