Wall Collapses At Fatorda: झोपेतच युवकावर काळाचा घाला; छप्पर आणि भिंत कोसळली

ताळसांझर-फातोर्डा येथे सकाळी साडेसहा वाजता घराचे छप्पर आणि भिंत कोसळून कार्तिक चौहान (वय १८ वर्षे) या युवकाचा झोपेत असतानाच मृत्यू झाला, तर त्याचे वडील दिग्विजय चौहान (वय ४६ वर्षे) जखमी झाले. त्‍यांच्‍यावर इस्‍पितळात उपचार सुरू आहेत. मडगावातील पडझडीची ही पाचवी घटना आहे.

हे घर पिएदाद फर्नांडिस यांचे आहे. ज्‍या घरात दुर्घटना घडली, तिथे हे दोघे भाड्याने राहात होते. घराच्या मागील खोलीत दिग्विजय चौहान आणि कार्तिक हे दोघे रात्री झोपले होते. सकाळी साडेसहा वाजता घराची मागील भिंत कोसळली. त्याचवेळी घराचे छप्परही खाली आले. कार्तिकच्या अंगावर छप्पर पडल्याने तो गंभीर जखमी झाला. छपराचा पत्रा लागल्‍याने मोठ्या प्रमाणात रक्तस्त्राव झाल्याने गंभीर अवस्थेत कार्तिकचा मृत्यू झाला. दिग्विजय यांच्या पायाला गंभीर दुखापत झाली आहे.

कार्तिकचा मृतदेह दक्षिण गोवा जिल्हा इस्पितळाच्या शवागारात ठेवला आहे, तर दिग्विजय यांच्यावर इस्पितळात उपचार सुरू आहेत. या घटनेची माहिती मिळताच या प्रभागाच्या नगरसेविका निमिषा फालेरो यांनी घटनास्थळी धाव घेत मदतकार्य केले. पालिकेच्या कामगारांनाही घटनास्थळी बोलावले होते; पण घराचे छप्पर काढण्याचा प्रयत्न केल्यास पूर्ण घरच कोसळण्याची शक्यता असल्‍याने मदतकार्यासाठी आपत्कालीन सेवा पथकाला बाेलाविण्‍यात आले.

सरकारी मदतीतून घराची दुरुस्ती

नगरसेवक निमिषा फालेरो य‍ांनी राज्य सरकारने आपदग्रस्त कुटुंबीयांना मदत करावी, तसेच कोमुनिदादच्या जागेतील घरांच्या सुरक्षिततेकडे लक्ष द्यावे, अशी मागणी केली आहे. या घराची दक्षिण गोवा आपत्कालीन सेवा पथकाने पाहणी केली असून तलाठ्यानेही नुकसानीचा आढावा घेतला आहे. सरकारी मदतीतून या घराची दुरुस्‍ती करण्‍याचे काम लवकरच हाती घेतले जाईल, अशी माहिती आमदार विजय सरदेसाई यांनी दिली.

पावसाच्या पाण्याने भिंत फुगली

ताळसांझर येथील कोमुनिदादच्या जागेत डोंगराच्‍या पायथ्‍याशी हे घर असून गेले काही दिवस संततधार पावसामुळे त्‍या घराची भिंत पाण्‍याने फुगली आणि आज सकाळी कोसळली.