Pissurlem Theft: तिसऱ्यांदा फोडले वाघुरे-पिसुर्लेतील व्याघ्रेश्वर मंदिर

गेल्या दोन-तीन दिवसांपासून पडणाऱ्या पावसाचा फायदा घेऊन शुक्रवार, ५ रोजी रात्री वाघुरे-पिसुर्ले येथील श्री व्याघ्रेश्वर मंदिरात चोरट्यांनी चोरी केली. गर्भकुडीच्या दोन दरवाजांची कुलपे तोडून आतील पितळीच्या किमती वस्तू तसेच फंडपेटीतील सुमारे दोन हजार रुपये चोरट्यानी गायब केले.

देवस्थान समितीचे अध्यक्ष रोहिदास राणे यांनी या घटनेची माहिती होंडा पोलिसांना देताच हवालदार रूपेश मळीक यांनी घटनास्थळी भेट देऊन पंचनामा केला.

हे मंदिर यापूर्वी दोनवेळा फोडले होते तर हा प्रकार तिसऱ्यांदा घडत आहे. या पूर्वी घडलेल्या दोन्ही घटनांचा छडा अद्याप लागलेला नाही, त्यामुळे या सराईत चोरट्यांना पकडण्यासाठी पोलिसांना बरेच प्रयत्न करावे लागणार आहेत. पुढील तपास सुरू आहे.