Bardez Rto : फॅन्सी, व्हीआयपी नंबरमुळे बार्देश आरटीओ ‘मालामाल’; वर्षभरात मिळवला 6.30 कोटी रुपयांहून अतिरिक्त महसूल

Bardez Rto : म्हापसा, आपल्या कार किंवा दुचाकी वाहनाला फॅन्सी नंबर असावा, अशी अनेक वाहनप्रेमींची इच्छा असते. अनेक वाहनप्रेमी फॅन्सी वा त्यांच्यासाठी शुभ असलेल्या ‘लकी नंबर’साठी मोठी रक्कम मोजायलाही तयार असतात.

याच व्हीआयपी व फॅन्सी नंबर शुल्कातून बार्देश आरटीओ कार्यालयाने गतवर्षी नोव्हेंबरपर्यंत तब्बल ६.३० कोटी रुपयांहून अधिक महसूल मिळवला असून २,१७३ हून अधिक व्हीआयपी नंबर देण्यात आले आहेत.

सध्या ग्राहकांमध्ये व्हीआयपी नंबरची बरीच क्रेझ असून त्यांना त्यांच्या वाहनांसाठी विशेष पसंती क्रमांक हवा असतो. आपल्या हौसेसाठी ग्राहक वर्ग लागेल तेवढे शुल्क भरण्यास तयार असतात, अशी माहिती आरटीओ विभागातील एका वरिष्ठ अधिकाऱ्यांनी दिली. नोंदणी क्रमांकासाठी अधिसूचनेनुसार शुल्क ठरवले जाते. निवडलेल्या मालिकेनुसार वाहन क्रमांकासाठी शुल्क आकारले जाते.

जर एकाच क्रमांकासाठी अधिक अर्ज आल्यास सर्वाधिक बोली लावणाऱ्याला तो क्रमांक मिळतो. काही ग्राहक नोंदणी क्रमांक त्यांच्या आयुष्यातील विशेष दिवस म्हणून किंवा जन्मकुंडली किंवा अंकशास्त्रानुसार भाग्यवान क्रमांक वगैरे काढतात आणि तो नंबर घेण्याकडे अनेकांचा कल असतो.

काही लोक आपल्या आवडीच्या क्रमांकासाठी एक तर प्रतीक्षा करतात किंवा नोंदणी मालिकेचा मागोवा ठेवतात. पण बरेच लोक त्यांना अपेक्षित असलेला क्रमांक मिळविण्यासाठी अतिरिक्त खर्च करण्यास मागे-पुढे पाहात नाहीत.