गोवा काँग्रेसकडून पंतप्रधान नरेंद्र मोदी, मुख्यमंत्री प्रमोद सावंत, प्रदेशाध्यक्ष सदानंद शेट तानावडे यांच्यासह आठ जणांची निवडणूक आयोगाकडे तक्रार केली आहे.
प्रदेशाध्यक्ष अमित पाटकर यांनी याप्रकरणी तक्रार मुख्य निवडणूक अधिकारी रमेश वर्मा यांच्याकडे तक्रार दाखल करत, कारवाईची मागणी केलीय. भाजपच्या सदस्यांनी आदर्श आचारसंहितेचा भंग केल्याचा आरोप या तक्रारीत करण्यात आला आहे.
विरियातो फर्नांडिस काँग्रेसचे दक्षिण गोवा उमेदवार आहेत. पण, भारतीय जनता पक्षाचे काही सदस्य विरियातो यांच्या भाषणाचा विपर्यास करुन, भाषणातील काही शब्द फिरवून त्यांची संविधानाचा अनादर केल्याचा तसेच, त्यांना संविधानाप्रती आदर नसल्याची माहिती पसरवत आहेत.
विरियातो कारगिल युद्धात सहभाग असलेले सैनिक असून, त्यांना संविधानाबाबत आदर आहे. दुहेरी नागरिकत्वाबाबत केलेल्या वक्तव्याचा विपर्यास करुन चुकीची माहिती पसरविण्याचा प्रयत्न केला जात आहे, असे पाटकर यांनी दाखल केलेल्या तक्रारीत म्हटले आहे.
तक्रारीत पंतप्रधान नरेंद्र मोदी, मुख्यमंत्री प्रमोद सावंत, प्रदेशाध्यक्ष सदानंद शेट तानावडे, आमदार माविन गुदिन्हो, आमदार संकल्प आमोणकर, आमदार दाजी साळकर, आमदार दिगंबर कामत, सरचिटणीस दामू नाईक यांच्या नावाचा समावेश आहे.
यात पंतप्रधान नरेंद्र मोदी यांच्या छत्तीसगड येथील भाषणाचा देखील उल्लेख करण्यात आला आहे. PM मोदी, CM सावंत यांच्यासह नमूद भाजप सदस्यांनी आदर्श आचारसंहितेचा भंग केला असून, त्यांच्याविरोधात योग्य कारवाई करावी, अशी मागणी पाटकर यांनी या तक्रारीद्वारे केली आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.