Benaulim: 'पार्किंग' जागेवरुन बाणावलीत भरली खास ग्रामसभा! 'खासगी' कंपनीला ग्रामस्थांचा कडाडून विरोध

Benaulim Beach Parking Issue

मडगाव: बाणावली समुद्र किनाऱ्याजवळ असलेली पार्किंग जागा खासगी कंपनीला देण्यास आज खास ग्रामसभेने विरोध केला. रात्री उशिरापर्यंत ही ग्रामसभा सुरू होती.

बाणावली समुद्र किनाऱ्यावर असलेली पार्किंग जागा पर्यटन खाते खासगी कंपनीला देणार, अशी बातमी पसरल्याने येथील ग्रामस्थांमध्ये चलबिचल निर्माण झाली होती. त्यामुळे आज खास ग्रामसभा बोलावण्यात आली होती.

पर्यटन खात्याकडून बाणावली पंचायतीला कुठलाही अधिकृत प्रस्ताव अजूनपर्यंत आलेला नाही, असा खुलासा पंचायतीतर्फे करण्यात आला. यावेळी बोलताना बाणावलीच्या उपसरपंच ग्लिडा फर्नांडिस यांनी ही पार्किंग जागा पर्यटन खाते ६० वर्षांच्या भाडेपट्टीवर खासगी कंपनीला देणार, अशी कल्पना स्थानिकांना असल्याने त्यांच्यात घबराटीचे वातावरण तयार झाले होते.

या पार्किंगच्या जागेत वाळूच्या टेकड्या असून त्यांचे संरक्षण करण्याची गरज आजच्या ग्रामसभेत व्‍यक्‍त झाली, अशीही माहिती त्यांनी दिली. शेवटी ही जागा भाडेपट्टीवर देण्यास विरोध करणारा ठराव ग्रामसभेने संमत केला.