Verna Accident: वेर्णा येथे भरधाव एसयूव्ही कारची 2 विद्यार्थीनींना धडक; 1 जागीच ठार

वेर्णा: वेर्णा माँजीनीसजवळ भरधाव वेगाने जाणाऱ्या एसयूव्ही कारने दोन विद्यार्थिनींना धडक दिल्याने एकीचा जागीच मृत्यू झाला असून दुसरी विद्यार्थिनी गंभीर जखमी झाली आहे. मृत विद्यार्थिनीचे नाव अनिषा बोरकर (वय २३, रा. केपे) असे असून, जखमी झालेल्या विद्यार्थिनीचे नाव अक्षता नाईक (रा. कारवार) असे आहे.

सदर घटना शनिवारी (३१ मे) घडली. अनिषा आणि अक्षता या दोघी रस्त्याने पायी चालत असताना भरधाव वेगाने आलेल्या एसयूव्हीने त्यांना जोरदार धडक दिली.

या अपघातात अनिषा हिला गंभीर दुखापत होऊन तिचा घटनास्थळीच मृत्यू झाला, तर अक्षता नाईक ही जखमी झाली असून तिच्यावर स्थानिक रूग्णालयात उपचार सुरू आहेत.

अपघातानंतर संबंधित कार चालकाने स्वतः वेर्णा पोलिस स्थानकात हजेरी लावली असून, त्याने घडलेल्या अपघाताची कबुली दिली आहे. पोलीस तपासात समोर आलेल्या प्राथमिक माहितीनुसार, कार चालवणारा तरुण पीसीसी कॉलेजचा विद्यार्थी असल्याचं स्पष्ट झालं आहे. वेर्णा पोलिसांनी घटनास्थळी भेट देऊन पंचनामा केला असून, अधिक तपास सुरू आहे.