खडकात अडकलेली क्रूझ बोट, वार्का पॅराग्लायडिंग प्रकरणाची पर्यटन मंत्र्यांकडून गंभीर दखल; मालकांना नोटीस

पणजी: दक्षिण गोव्यात वार्का येथे गुरुवारी पॅरासेलिंग करताना घडलेली घटना आणि उत्तर गोव्यात आग्वाद येथील खडकात अडकलेली क्रूझ बोट प्रकरणात पर्यटकांच्या जीवाशी खेळ झाल्याच्या घटनेची दखल पर्यटन मंत्री रोहन खंवटे यांनी गंभीरपणे घेतली आहे. याप्रकरणी दोन्ही प्रकरणातील संबंधित मालकांना कारणे दाखवा नोटीस बजावण्यास पर्यटन खात्यास आदेश दिल्याची माहिती खंवटे यांनी दिली.

मंत्रालयातून बाहेर पडत असताना शुक्रवारी त्यांना घडलेल्या घटनांविषयी खात्याची भूमिकेविषयी विचारणा केली असता ते म्हणाले की, वार्का येथे पॅरासेलिंगचा घटना घडली, त्यापूर्वीच आम्ही जलक्रीडा संघटनांबरोबर बैठक घेतली होती. याविषयी आम्ही सबंधित कारणे दाखवा नोटीस काढण्यास सांगितले आहे.

आग्वाद येथील बोट मालकासही कारणे दाखवा नोटीस बजावल्यास त्यातून माहिती उपलब्ध होऊ शकते. या घटनांवर जी काय कारवाई करायची आहे, ती तात्काळ घेतली जाईल.

...तर कारवाई आवश्यक

खंवटे म्हणाले की, पर्यटांचा अनुभव महत्त्वाचा आहे. पॅरासेलिंगवाल्याने तो प्रकार डेमो करताना घडल्याचे कारण सांगितले आहे. मात्र असे डेमो हे पर्यटकांबरोबर केले जात नाहीत, हे स्पष्ट आहे.

परवाच जलक्रीडा संघटनांना बोलावून त्यांच्या समस्या आम्ही ऐकून घेतल्या होत्या. त्या समस्या सोडविण्यासाठी आम्हाला त्यांचे सहकार्य आवश्यक आहे.

पर्यटन क्षेत्रात जे गोंयकार आहेत, ते पर्यटनाचे राजदूत आहेत. त्यामुळे या घटनांविषयी अजिबात तडजोड केली जाणार नाही.

पर्यटन क्षेत्राशी निगडित व्यावसायिकांनी दोन पैसे मिळवावेत, त्यांच्याकडून पर्यटकांना चांगली सेवा मिळावी अशी आमची अपेक्षा आहे.

व्यवसायात जर बेकायदेशीरपणा असेल तर त्यांच्यावर कारवाई होणेही आवश्यक आहेच, असे खंवटे यांनी नमूद केले.