Goa Police: कर्नाटकातून गाडी चोरणाऱ्यांना गोवा पोलिसांकडून अटक

Goa Police: कर्नाटकातून टाटा एस पिकअप हे वाहन चोरून आणताना कुळे पोलिसांनी पकडले आणि चालक अनंत (30, रा. नीलानगर-म्हैसूर) याला ताब्यात घेतले.

कुळेचे पोलिस निरीक्षक संजय दळवी यांनी दिलेल्या माहितीनुसार, उपनिरीक्षक अजय धुरी कर्मचाऱ्यांसह गस्तीवर असताना कर्नाटक परिसरातील अनमोड घाट येथे टाटा नेक्‍सॉन कार (एमएच 02 एफआर 7996) आणि टाटा पिकअप (केए 17 डी 8907) यांच्यात हिट अँड रन प्रकरण घडले. ही पिकअप मोलेच्‍या दिशेने येत होती.

उपनिरीक्षक धुरी अपघातग्रस्‍त टाटा पिकअपवर लक्ष ठेवून होते. जेव्‍हा ती आली, तेव्‍हा त्‍यांनी ती थांबविण्यासाठी हात दाखविला. पण पिकअप थांबली नाही.

त्यानंतर पाठलाग करून पिकअपला पकडले व चालकासह वाहन मोले आऊट पोस्टवर आणले. तेव्हा याच पिकअपने टाटा नेक्सॉन कारला रामनगर पोलिसांच्या हद्दीत धडक दिल्याची पुष्टी झाली.

त्यानंतर अधिक चौकशी केली असता सदर पिकअप 29 जानेवारी रोजी बागलकोट येथून चोरीला गेल्याची माहिती कळली. दरम्‍यान, सर्व सोपस्कार पूर्ण करून वाहनचालक चालक अनंत याला बागलकोट पोलिसांच्या ताब्यात देण्‍यात येणार आहे.