Vegetables Price In Goa: चतुर्थीच्या तोंडावर भाज्‍या महागणार!

Vegetables Price In Goa: राज्याबाहेरून येणाऱ्या भाज्यांचे दर स्थिर झाले असले तरी चतुर्थीच्या तोंडावर ते कडाडण्याची शक्यता आहे. तसे संकेत येथील आठवडी बाजारातील भाजीविक्रेत्यांकडून मिळाले आहेत.

कारण कोणतेही असो, मात्र चतुर्थीच्‍या काळात भाज्यांना प्रचंड मागणी असल्याने विक्रेते या संधीचा फायदा घेण्याची शक्यता आहेच.

गणेश चतुर्थी हा राज्‍यातील सर्वांत मोठा सण. या काळात भाज्यांना प्रचंड मागणी असते. साहजिकच भाज्यांचे दर वाढू शकतात, असा अंदाज भाजीविक्रेते रमेश रेड्डी यांनी व्यक्त केला.

दरम्यान, सध्या भाज्या स्वस्त झाल्याने महागाईने त्रस्त झालेल्या ग्राहकांना थोडा दिलासा मिळाला आहे.

भाज्या झाल्या स्वस्त

गेल्या महिन्यापासून डिचोलीत कर्नाटक राज्यातून येणाऱ्या भाज्यांची आवक वाढत आहे. आज बुधवारी आठवडी बाजारात तर डिचोलीत प्रचंड प्रमाणात भाज्यांची आवक झाली होती. त्‍यामुळे दरही खाली आले होते.

आज कांदे ३० ते ४० रुपये किलो, टोमॅटो २० ते ३० रुपये तर बटाटे ३० रुपये किलो या दराने विकण्यात येत होते. ६० ते ८० रुपये किलो वालपापडी आणि चिटकीमिटकीचे दर होते. अन्य भाज्याही स्वस्त झाल्या.