सुवासिनींच्या उत्साहाला उधाण! राज्यात आज वटपौर्णिमा धार्मिक विधीनुसार साजरी

वास्को: पतिव्रतेचे महात्म्य वर्णन करणारे आणि सुवासिनींच्या उत्साहाला उधाण देणारे व्रत म्हणजे वटपौर्णिमा आज वास्कोत मोठ्या उत्साहात गुण्यागोविंदाने धार्मिक विधीनुसार सुवासिनींतर्फे साजरी करण्यात आली.

(Vatpoornima celebrated with great enthusiasm in the Goa today)

आज वटपौर्णिमा साजरी होत असल्याने सर्वत्र सूवासिनींमध्ये उत्साह संचारला होता. कोविडमुळे गेली दोन वर्षे वटपौर्णिमेच्या उत्सवावर विरजण पडले होते.तसेच बाजारावर निर्बंध होता. यंदा हे निर्बंध शिथिल झाल्याने काल वटपौर्णिमेच्या साहित्याने बाजार फुलून गेला होता. आज वटपौर्णिमा साजरी करण्यासाठी लागणारे साहित्य खरेदीसाठी महीलांनी काल बाजारात गर्दी केली होती. आंबे, फणस, केळी व इतर फळे, वडाच्या फांद्या, वडाची पाने,अणशीचे दोर आदी साहित्याची मोठ्या प्रमाणात विक्री झालेली पाहावयास मिळाली. वटपौर्णिमेच्या साहित्याला चांगली मागणी होती. त्यानुसार व्यापारी वर्गाचा व्यापार बरा झाला.

दरम्यान आज सुवासिनींतर्फे वटपौर्णिमा उत्साहात साजरी करण्यात आली प्रत्येक मंदिरात सकाळपासून महिलांची गर्दी होती. मंदिराकडे असलेल्या वडाला सूत गुंडाळून व इतर धार्मिक विधी करून सुवासिनींनी वडाची पूजा केली व जन्मोजन्मी हाच नवरा मिळू दे अशी प्रार्थना करून व्रत केले व उपवास पाळला. पुरोहितांच्या मंत्रोच्चाराने सदर धार्मिक विधी पार पडली. नव वर वधूंचाही मोठ्या प्रमाणात सहभाग होता. वडाची पूजा अर्च्या झाल्यानंतर सुवासिनींतफेॆ एकमेकांना हळदी कुंकू करून प्रसाद म्हणून फळांवरांनी भरलेला द्रोड वाण म्हणून देण्यात आला.